2026 jylǵy 1 qyrkúıekten bastap Grýzıada sheteldikterge qatysty eńbek erejeleri qatańdady: endi zańsyz jumys istegender elden shyǵarylýy, ákimshilik aıyppul salynýy nemese eki jyldan bes jylǵa deıin elge kirýge tyıym salynýy múmkin. Bul týraly Qazaqstan Respýblıkasynyń Syrtqy ister mınıstrligi eskertti, dep habarlaıdy infohub.kz saıty.
Vedomstvonyń atap ótýinshe, Qazaqstan azamattary úshin Grýzıaǵa vızasyz kirý jáne onda 365 kúnge deıin bolý rejımi áli de saqtalady. Alaıda, SİM málimdegendeı, bul rejım jumysqa ornalasý quqyǵyn bermeıdi.
Mınıstrliktiń túsindirýinshe, Grýzıadaǵy zańsyz eńbek qyzmeti ákimshilik aıyppulǵa, 2 jyldan 5 jylǵa deıin elge kirýge tyıym salýǵa, sondaı-aq elden shyǵarýǵa ákep soǵady.
«Osyǵan baılanysty Grýzıada jumysqa ornalasýdy, kásipkerlik nemese ózge de aqyly qyzmetti josparlap otyrǵan Qazaqstan azamattaryna osyndaı qyzmetti bastamas buryn grýzın zańnamasynda kózdelgen jumys isteý quqyǵynyń bar ekenine kóz jetkizý qajet», — dep eskertti SİM.
Mınıstrlik sondaı-aq qazaqstandyqtardy Grýzıanyń zańdary men kóshi-qon erejelerin qatań saqtaýǵa jáne aıyppulǵa, elden shyǵarylýǵa jáne keıinnen kirýge shekteý qoıýǵa ákep soǵatyn buzýshylyqtarǵa jol bermeýge shaqyrdy.
Buǵan deıin «Kýrsıv» Qytaıda 15 qyrkúıekten bastap kirý jáne shyǵý erejeleriniń jańa nusqasy kúshine engenin jazǵan bolatyn. Vıza rásimdeý kezinde nemese shekaralyq baqylaýda jalǵan málimet bergen sheteldikterge QHR-ǵa bes jylǵa deıin kirýge tyıym salynady.