Soltústik Qazaqstan oblysynda el aýmaǵynda jumys istegen iri "Nomad Poker" onlaın-kazınosynyń qyzmeti toqtatyldy, dep habarlaıdy infohub.kz saıty.
Tergeý barysynda kazıno "Club GG Poker" mobıldi platformasy negizinde qurylyp, ony Grýzıada júrgen Qazaqstan azamattary úılestirgeni anyqtaldy. Osy sqemany paıdalana otyryp, uıymdastyrýshylar ózderiniń jeke basyn jasyryp, qarjy aǵyndaryn baqylaýdy qıyndatyp, shetel azamattaryna resimdelgen shottar men baılanys quraldaryn zańsyz qyzmetke paıdalanǵan.
Zańsyz oıyn platformasy táýlik boıy jumys istep, onlaın-poker formatynda aqsha stavkalaryn engizip, utystardy shyǵarý múmkindigin bergen. Jańa qatysýshylardy tartý úshin uıymdastyrýshylar áleýmettik jeliler, messendjerler jáne jarnama quraldaryn belsendi paıdalanǵan.
Nátıjesinde onlaın-kazınoǵa 20 myńnan astam paıdalanýshy tartylǵan. Sonymen qatar, uıymdastyrýshylar úshinshi tulǵalardyń bank shottaryn — dropperlerdiń keń júıesin qurǵan. Ol úshin kúdiktiler shetel azamattarynyń Qazaqstanǵa uıymdasqan túrde kirýin qamtamasyz etip, olarǵa 400 dollarǵa deıin syıaqy úshin banktik kartalar men mobıldi bankıng rásimdegen.
Onlaın-kazıno qyzmetine 60-tan astam drop-shot paıdalanylǵany anyqtaldy. Oıynshylardan túsken jalpy soma 7,5 mlrd teńgeden asqan.
Tergeý qorytyndysy boıynsha sot Almatydaǵy páterge, úsh avtokólikke, sondaı-aq dropperlerdiń bank shottaryndaǵy 158 mln teńge kólemindegi aqshaǵa tyıym saldy. Tergeý jalǵasýda.