Grýzıadan Qazaqstanǵa sıntetıkalyq esirtkini asa iri mólsherde satty jáne qylmystyq kiristerdi zańdastyrdy dep kúdiktelgen azamat jetkizildi, dep habarlaıdy Infohub.kz.
Bas prokýratýranyń málimetinshe, qadaǵalaý organynyń qyzmetkerleri İshki ister mınıstrliginiń Interpolymen birlesip, Qazaqstannyń Grýzıadaǵy Elshiliginiń kómegimen uıymdasqan qylmystyq toptyń múshesi bolǵan qazaqstandyqty ekstradısıalady. Bul top psıhotroptyq zattardyń zańsyz aınalymymen jáne aqshany jylystatýmen aınalysqan.
Tergeý anyqtaǵandaı, kúdikti Almaty oblysynyń aýmaǵynda esirtki óndirisin asa iri mólsherde uıymdastyrǵan. Daıyndalǵan psıhotroptyq zattardyń analogtary keıin «zakladkalar» arqyly taratylǵan.
Qylmystyq toptan 10 kelige jýyq mefedron psıhotroptyq zaty tárkilendi. 1,8 mıllıard teńgeden asatyn zańsyz kiristi qylmyskerler ártúrli qarjylyq operasıalar, sonyń ishinde krıptoaıyrbastaý pýnktteri arqyly zańdastyrǵan. Sonymen qatar, olar 600 mıllıon teńgeden astam somaǵa jyljymaıtyn múlik, bıznes obektileri jáne kólik quraldaryn satyp alǵan. Bul aktıvterge keıin memleket kirisine aınaldyrý maqsatynda tyıym salynǵan.
Bas prokýratýrada qylmystyq toptyń bir bóligi sotqa berilgenin jáne olardyń isteri boıynsha sot talqylaýy júrip jatqanyn atap ótti. Basqa músheler, sonyń ishinde kúdikti de, tergeýden jasyrynyp, halyqaralyq izdeý jarıalanǵan. Aǵymdaǵy jyldyń qańtarynda kúdikti Grýzıa aýmaǵynda ustalyp, Bas prokýratýranyń suraýy boıynsha Qazaqstanǵa ekstradısıalandy.
Qazirgi ýaqytta er adam tergeý ızolátoryna qamaldy. Oǵan taǵylǵan aıyptar boıynsha múlikti tárkileýmen 20 jylǵa deıin bas bostandyǵynan aıyrý jazasy qarastyrylǵan.