Ǵalymdar jyldar boıy ártúrli elderdiń turǵyndaryn alańdatyp kelgen jahandyq tómengi jıilikti shýdyń qupıasyn ashty. Bul dybystar qupıa nysandardan nemese muhıttan shyqpaıdy, adamnyń estý júıesinde paıda bolady, dep jazady Science Daily, infohub.kz habarlaıdy.
«Gýil» (The Hum) dep atalatyn fenomen ondaǵan jyldar boıy AQSh, Ulybrıtanıa jáne basqa elderde tirkelip keledi. Adamdar úıdiń ishinde túnde estiletin, qozǵaltqyshtyń jumysyna uqsas tómengi jıilikti dybysqa shaǵymdanady. Ony aınaladaǵylar baıqamaýy múmkin. Norvegıa ǵylym jáne tehnologıa ýnıversıtetiniń profesory Markýs Dreksl basqaratyn zertteý toby osy qubylystan zardap shegetin 28 adamdy synady.
Aldymen ǵalymdar bul adamdardyń estý qabileti erekshe, zaýyttardyń nemese muhıt tolqyndarynyń qashyqtaǵy dirilderin ustaı alatynyn tekserdi. Bul teorıa tek eki qatysýshyda rastaldy. Sodan keıin mamandar spontandy otoakýstıkalyq emısıany — ishki qulaqtyń ózi shyǵaratyn mıkro-dybystardy ólshedi. Biraq bul faktor da sebep bolmady. «PLOS One» jýrnalynda jarıalanǵan jumystyń avtorlary kóp jaǵdaıda jahandyq gýil sýbektıvti tómengi jıilikti tınnıtýstyń (qulaqtyń shýy) erekshe túri degen qorytyndyǵa keldi. Adam bul estý júıesiniń aqaýyn shynaıy túrde syrtqy titirkendirgish retinde qabyldaıdy.