Seýl soty Qytaı azamatyn BTS tobynyń múshesi Chongýk pen ońtústikkoreıalyq bıznesmenderge qarsy hakerlik sqemaǵa qatysqany úshin 20 jylǵa bas bostandyǵynan aıyrý jazasyna kesti. Qylmyskerler 38 mlrd vonnan astam (shamamen 12,5 mlrd teńge) aktıvterdi urlamaq bolǵan, dep habarlaıdy infohub.kz.
Tergeý anyqtaǵandaı, Chýn esimdi sottalǵan adam 2023 jyldyń tamyzy men 2025 jyldyń qańtary aralyǵynda baı adamdardyń jeke derekterin jınaǵan qylmystyq toptyń quramynda bolǵan. Keıin olar adamdardyń atyna mobıldi nómirler rásimdep, shottarǵa qol jetkizip, aqsha aýdarǵan.
Maqsattardyń biri Chongýk boldy. Hakerler oǵan tıesili HYBE kompanıasynyń (BigHit Music agenttiginiń analyq kompanıasy) 8,4 mlrd von (shamamen 2,76 mlrd teńge) turatyn aksıalaryn urlamaq bolǵan. Agenttik ýaqytynda áreket etip, qylmyskerlerdiń operasıany aıaqtaýyna jol bermedi.
Sot sonymen qatar Chýnnyń shynaıy ókinbegenin atap ótti. Sýdıalardyń aıtýynsha, qylmyskerler ádeıi baı adamdardy tańdap, olardyń aktıvterin alyp otyrǵan, al qurbandardyń ózderi eshqandaı qatelik jasamaǵan.