Buǵan deıin «Dodo Pıssa» dereqoryn buzǵanyn jarıalaǵan DATASUCKERS hakerlik toby Qazaqstan boıynsha statısıkasyn jarıalady. Olardyń tujyrymynsha, qolǵa túsken derekterde 6,5 mln qazaqstandyq klıent týraly aqparat bar, dep habarlaıdy infohub.kz saıty.
Toptyń málimdemesine sáıkes, Qazaqstan boıynsha bazada 6 537 929 biregeı telefon nómiri, 6 725 137 klıent jáne 59 mln-nan astam biregeı tapsyrys bar. Jalpy alǵanda, hakerler túrli oqıǵalar týraly 522 mln jazba bar deıdi.
Dálel retinde DATASUCKERS Qazaqstannan sońǵy tirkelgen 1 000 paıdalanýshynyń derekterin de jarıalady, alaıda keıin bul úzindi joıyldy.
Buǵan deıin «Dodo Pıssa» óziniń Telegram-arnasynda kompanıanyń IT-júıesine kıberataka bolǵanyn rastady. Pıssa óndirýshisi qaskóıler klıentterdiń bir bóliginiń derekterine — aty-jónine, mekenjaıyna, elektrondyq poshtasyna, telefon nómirlerine, týǵan kúnderine jáne tapsyrys tarıhyna — qol jetkizýi múmkin dep joramaldady.
Sonymen qatar «Dodo Pıssa» shabýylǵa ushyraǵan júıede klıentterdiń tólem operasıalary týraly derekterdi saqtamaıtynyn, sondyqtan olar hakerlerge tımegenin málimdedi.
DATASUCKERS hakerlik tobynyń aqparatynsha, «Dodo Pıssa» klıentteriniń shamamen 68 mln-y týraly 2–3 TB aqparat, onyń ishinde ártúrli elderdegi paıdalanýshylardyń derekteri men tapsyrys tarıhy urlanǵan. Bul sandarǵa ázirge táýelsiz rastaý joq, al kompanıanyń ózi zardap shekken klıentterdiń naqty sanyn jarıalaǵan joq.