Úndistanda dástúrli Navratrı festıvali qarsańynda áleýmettik jelilerde erekshe qyzmet — «garba bıine seriktes jaldaý» týraly vırýstyq jazba tarady. Instagram-daǵy jazbanyń avtory Krısh Mıstrı esimdi qoldanýshy «Osy Navratrı jalǵyz bıleme!» degen uranmen jarnamalyq plakat jarıalap, bıleıtin serigi joq adamdarǵa arnalǵan úsh tarıftik paketti usyndy, dep habarlaıdy infohub.kz saıty.
Eń qoljetimdi «Kúmis» paketi 1000 rýpıge baǵalanǵan. Bul somaǵa klıent eki saǵat boıy garba bıin birge bıleýdi, juptasyp kıim tańdaýdy, negizgi qımyldardy úırenýdi jáne birge selfı jasaýdy alady.
1500 rýpı turatyn «Altyn» paketi tórt saǵatqa eseptelgen. Oǵan birge beınejazbalar túsirý, sondaı-aq dostarǵa arnalǵan súıkimdi tanysý tarıhyn oılap tabý jáne klıenttiń tanystaryn «aǵa» jáne «jeńge» dep ataý múmkindigi kiredi.
Eń qymbat «Platına» paketi 2000 rýpıge kúni boıy súıemeldeýdi, dástúrli kıim elementteri men áshekeılerge kómektesýdi, eń úzdik bı qımyldaryn kórsetýdi jáne is-shara aıaqtalǵan soń úıge qaýipsiz shyǵaryp salýdy usynady.
Jazba 1,7 mıllıonnan astam qaralym jınap, qoldanýshylar arasynda qyzý talqylaý týdyrdy. Kóptegen komentatorlar usynysty ázil nemese Z urpaǵynyń ózindik tabys tabý jobasy retinde qabyldady, al keıbir jazylýshylar qyzmetti brondaýǵa shynaıy qyzyǵýshylyq tanytty.