Home Credit Bank basshylyǵy 2025 jylǵa 1,3 mlrd teńge kóleminde syıaqy alǵanyn infohub.kz saıty habarlaıdy.
Bank basqarmasynyń quramynda úsh adam boldy, olar jeltoqsan aıynyń sońynda aksıonerler aýysqannan keıin bankten ketti. Orta eseppen árqaısysy jylyna 439 mln teńge aldy.
2025 jyly Home Credit Bank basqarma múshelerine tólengen jalpy soma 1,3 mlrd teńgeni qurady. Bul somaǵa jalaqylar men barlyq aqshalaı kótermeleý túrleri kiredi. Sonymen qatar, ótken jylmen salystyrǵanda bank basshylyǵynyń syıaqysy bes ese ósti: 2024 jyly ol 293 mln teńgeni quraǵan edi.
Bank basqarmasy 2025 jyldyń sońyna deıin, sondaı-aq 2024 jyl boıy úsh adamnan turdy: Bolgarıadan shyqqan basqarma tóraǵasy Kırıl Bachvarov, qazaqstandyq Vıktor Batrak jáne Chehıadan kelgen Zdenek Foýkal.
11 jeltoqsanda banktiń baqylaý paketi ForteBank-ke ótkennen keıin, Home Credit Bank basqarmasynyń jańa tóraǵasy Sholpan Nurymbet bolǵany jarıalandy. Jyl sońyna qaraı bank basqarmasynyń quramy tolyǵymen jańartyldy. Bachvarov pen Foýkaldyń ornyna Dınara Ahatova, Gaýhar Masanǵalıeva jáne Stanıslav Tán keldi.
Osylaısha, jyldyń kóp bóliginde basqarma quramy ózgermegenin eskersek, onyń músheleri orta eseppen jylyna 439 mln teńge aldy. Bul aıyna 36,6 mln teńge tabysqa teń.
Aıta keteıik, 2025 jyldyń ortasyna deıin Home Credit Bank chehıalyq PPF Financial Holdings kompanıasynyń qyzmetkerlerine jáne tikeleı kompanıanyń ózine tıesili boldy. İri aksıonerlerdiń biri kompanıanyń top-menedjeri Irjı Shmeıs edi. PPF-tiń ıesi — Chehıadaǵy eń baı áıel Renata Kellnerovanyń otbasy (onyń baılyǵy $19 mlrd dep baǵalanady).
Maýsym aıynda ForteBank Home Credit Bank-tiń 100% aksıasyn satyp alý týraly prınsıpti kelisimge qol jetkizdi. Mámile jeltoqsan aıynyń sońynda aıaqtaldy.