Iemendik «Ansar Alla» (hýsıtter) qozǵalysy Saýd Arabıasyna qarsy teńiz blokadasyn engizetinin málimdedi, bul álemdik munaı naryǵyna eleýli qaýip tóndiredi, dep habarlaıdy infohub.kz.
Qozǵalystyń áskerı ókili Iahá Sarıa Iemen qarýly kúshteri Saýd Arabıasyna qatysty teńiz keme qatynasyna «blokadaǵa blokadamen jaýap berý» prınsıpi boıynsha tyıym salatynyn málimdedi. Sheshim málimdeme jarıalanǵan sátten bastap kúshine endi. Hýsıtter óz áreketterin Iemenge qarsy jyldar boıy júrgizilip kele jatqan blokadaǵa jaýap dep sanaıdy. Olar Saýd Arabıasyn porttar men áýejaılardy buǵattady, sondaı-aq el aýmaǵyna soqqy jasady dep aıyptady. Sondaı-aq málimdemede qozǵalys «oqıǵanyń kez kelgen nusqasyna» daıyn ekenin bildirip, Er-Rıad tarapynan odan ári shıelenisý jaǵdaıynda qatań jaýap berýmen qorqytty. Sonymen qatar hýsıtter Iemen turǵyndaryn jalpy jumyldyrýǵa jáne qarýly quramalardy qoldaýǵa daıyn bolýǵa shaqyrdy.
Reuters habarlaýynsha, bul qadam AQSh pen Iran arasyndaǵy qaqtyǵys fonynda qarama-qaıshylyqtyń jańa maıdanyn ashyp, álemdik munaı jetkizilimderi men halyqaralyq saýdaǵa qaýipti kúsheıtedi. Er-Rıad ázirge resmı túrde túsinik bermedi. Reuters baǵalaýynsha, Bab-ál-Mandeb buǵazynyń – álemdegi eń mańyzdy teńiz joldarynyń biriniń – tolyq jabylýy álemdik munaı jetkizilimin shamamen 7%-ǵa qysqartýy múmkin, sebebi saýd eksportynyń edáýir bóligi osy baǵyttan ótedi. Bul Parsy shyǵanaǵyndaǵy qaqtyǵystyń saldaryn kúsheıtýi múmkin, ol álemdik munaı jetkizilimin shamamen 10%-ǵa qysqartqan bolatyn.
Hýsıtterdiń málimdemesi Iran men AQSh arasyndaǵy shıelenisti tómendetýge baǵyttalǵan jańa dıplomatıalyq áreketter týraly habarlar aıasynda jasaldy. Reuters derekteri boıynsha, Tegeran deldaldar arqyly 10 kúndik atysty toqtatý usynysyn aldy, bul ótken aıda jasalǵan ýaqytsha kelisimdi saqtaýǵa jáne ári qaraıǵy kelissózderge jaǵdaı jasaýǵa kómektesýi tıis. Buǵan deıin dúısenbi kúni munaı baǵasy Ormýz buǵazy arqyly keme qatynasyndaǵy jańa úzilisterden keıin bir barel úshin 90 dollardan qysqa ýaqytqa asyp ketti. Keıin Iran SİM-iniń deldaldyq baılanystar jalǵasýda degen málimdemelerinen keıin baǵalar ishinara tómendedi. Osy aıada Islam revolúsıasy kúzetshileri korpýsy Iran qalalaryna jasalǵan amerıkandyq shabýyldardyń kezekti serıasyna jaýap retinde aımaqtaǵy amerıkandyq áskerı nysandarǵa soqqy jasalǵanyn habarlady. Sonymen qatar Iran bıligi qaqtyǵystyń shıelenisýin báseńdetýge úmittene otyryp, dıplomatıalyq baılanystardy jalǵastyrýda.