Álemdik tusaýkeserge daıyndalyp jatqan jańa Hyundai Tucson erekshe oqıǵanyń ortasynan tabyldy: Avstrıa Alpisindegi synaq kezinde serıaǵa deıingi krosoverdiń aldyńǵy tejegishteri qyzyp ketip, órt shyqty, dep habarlaıdy infohub.kz saıty.
The Korean Car Blog basylymynyń dereginshe, Hyundai ınjenerleri tejegish júıesiniń tıimdiligin ekstremaldy jaǵdaıda teksergen. Ol úshin prototıp tirkememen taýly serpantınmen kóterilip, maksımaldy júkteme jasaǵan. Aldymen kóliktiń aldyńǵy bóliginen qoıý tútin shyǵyp, keıin aldyńǵy oste jalyn tutanǵan. Órtti sóndirý úshin komanda birneshe órt sóndirgishti qoldanýǵa májbúr bolǵan. Joǵary temperatýradan eki aldyńǵy dóńgelek te jarylyp, synaqty toqtatýǵa týra kelgen.
Bir qaraǵanda, bul jaǵdaı Hyundai úshin yńǵaısyz bolyp kórinedi. Alaıda mundaı oqıǵalar dál zaýyttyq synaqtar kezinde bolady, óıtkeni ınjenerler qarapaıym júrgizýshi eshqashan kezdestirmeıtin jaǵdaılardy ádeıi jasaıdy. Bul synaqtardyń maqsaty – kólik naryqqa shyqqanǵa deıin álsiz tustaryn anyqtaý.
Jańa býyn Hyundai Tucson (NX5) gıbrıdti nusqalarǵa basymdyq beredi. BAQ derekterine súıensek, krosover jańa TMED-II qýat qondyrǵysyn, elektr qýatymen shamamen 100 km júretin qosylatyn gıbrıdti, sondaı-aq qýaty 300 at kúshinen asatyn N nusqasyn alady. XRT Pro joldan tys modıfıkasıasy da kútilýde. Modeldiń álemdik tusaýkeseri 2026 jyldyń sońyna josparlanǵan.
Buǵan deıin jańa Tucson ishki kórinisi alǵash ret kórsetilgen bolatyn. Sondaı-aq Hyundai jańa býynda Kona krosoveriniń syrtqy kelbetin túbegeıli ózgertetini habarlanǵan.