Bıylǵy parodıalyq ǵylymı syılyq — Ignobel — alǵash ret AQSH-tan tys jerde, Súrıhte ótti. Saltanatty sharaǵa qatysýshylardyń vıza alý qıyndyqtaryna baılanysty uıymdastyrýshylar 35 jyldan keıin Eýropaǵa aýystyrýdy jón kórdi. Bul týraly infohub.kz saıty habarlaıdy.
Syılyqtyń bul jolǵy ıegerleri — 10 zertteý toby. Olardyń qatarynda taraqan sútin zerttegen ǵalymdar, ish kıim arqyly topyraq sapasyn anyqtaǵan mamandar, súıisý evolúsıasyn qalpyna keltirgen Oksford ýnıversıtetiniń ókilderi Mátılda Brındl men Stúart Vest, sondaı-aq Florıda tehnologıalyq ınstıtýtynan Ketrın Talbot jáne muryn qaqqan kezdegi prosesti zerttegen marqum doktor Tokýdjı Ýnno bar.
Dástúr boıynsha, shara barysynda kórermender qaǵaz ushaqtar jasap, sahnaǵa laqtyrdy. Bul — Ignobel syılyǵynyń ajyramas bóligi. Saltanatty rásim Shveısarıanyń Súrıh qalasyndaǵy kongres-ortalyqta ótti. Jeńimpazdarǵa sańyraýqulaq pen adam aıaǵynyń qosyndysyn eske túsiretin arnaıy músinshe tabystaldy.
Aldaǵy ýaqytta uıymdastyrýshylar Súrıh pen basqa da Eýropa qalalarynda kezektesip ótkizýdi josparlap otyr. 2027 jyly shara Belgıanyń Antverpen qalasynda ótedi. Buǵan deıin Ignobel Garvard, Massachýsets tehnologıalyq ınstıtýty jáne Boston ýnıversıtetinde ótken edi. Alaıda AQSH-qa qaıta oralý jospary joq.
Sharanyń júrgizýshisi ári jýrnal redaktory Mark Abrahams naýryz aıynda Associated Press agenttigine joldaǵan hatynda: «Ótken jyl ishinde qonaqtarymyzdyń elge kelýi qaýipti boldy», — dep málimdegen. Ignobel syılyǵynyń Nobel syılyǵyna esh qatysy joq. Al Nobel syılyǵynyń ıegerleri qazan aıynyń basynda jarıalanady.