Qazaqstan polısıasy jyl basynan beri avtomattar, tapanshalar, myltyqtar, granatatqyshtar men oq-dárilerdi qosa alǵanda, 1700-den astam qylmystyq qarýdy tárkiledi. Bul týraly infohub.kz saıty habarlaıdy.
İshki ister mınıstrliginiń vedimistik saıtynda jarıalanǵan derekterge sáıkes, tárkilengenderdiń ishinde 34 avtomat, 458 tapansha, myńnan astam myltyq, úsh granatatqysh jáne shamamen 12 myń oq-dári bar.
2022 jylǵy qańtar oqıǵalary kezinde urlanǵan qarýdy izdestirýge erekshe kóńil bólinýde. Bul jumys búkil el boıynsha jalǵasýda. Jyl basynan beri zańsyz aınalymnan osyndaı 152 birlik qarý alyndy, tek qyrkúıekte taǵy 9 birlik tárkilendi.
«Tamyzda Almaty men Óskemende polısıa qyzmetkerleri Almaty oblysynyń eki turǵynynan Almatydaǵy qarý dúkenderinen qańtar oqıǵalary kezinde urlanǵan úsh birlik qarýdy tárkiledi. Qyrkúıek basynda Tarazda úıinde Makarov tapanshasyn saqtaǵan jergilikti turǵyn ustaldy. Bul qarý da 2022 jyldyń qańtarynda Jambyl oblysynda urlanǵany anyqtaldy. Kúdiktiler qamaýǵa alyndy. Tergeý júrgizilýde», — delingen polısıa habarlamasynda.
Sonymen qatar, zańsyz saqtalǵan qarýdy erikti túrde tapsyrý jónindegi respýblıkalyq aksıa da jalǵasýda. 20 sáýirden bastap azamattar erikti túrde 900-den astam qarý men 6 myńǵa jýyq oq-dári tapsyrdy.
«Zańsyz saqtalǵan qarýdy erikti túrde tapsyrǵan adamdar zańda belgilengen tártippen qylmystyq jáne ákimshilik jaýapkershilikten bosatylady. Eger qarýdyń zańsyz saqtalǵan jerleri týraly bilseńiz, «102» nómirine nemese eOtinish servısi arqyly polısıaǵa habarlasyńyz. Anonımdilikke kepildik beriledi», — dep qosty polısıa.