Jańa oqý jyly bastalǵaly beri Qazaqstan polıseıleri mektepter men oqý oryndarynda aýqymdy profılaktıkalyq jumys júrgizdi. Endi İshki ister mınıstrligi barlyq ata-analar men kámeletke tolmaǵandardyń zańdy ókilderine, sondaı-aq stýdent jastar men ózin-ózi jumyspen qamtyǵan jastarǵa júgindi, dep habarlaıdy infohub.kz saıty.
Vedomstvonyń túsindirýinshe, profılaktıkalyq is-sharalar eldegi barlyq derlik mektep pen oqý ornyn qamtydy. Barlyǵy 16 myń profılaktıkalyq shara ótkizildi, onyń 5 myńnan astamy tájirıbeli pedagogterdiń, psıhologterdiń jáne narkolog dárigerlerdiń qatysýymen ótti.
İİM dereginshe, búgingi tańda nashaqorlyq qylmysy boıynsha 69 kámeletke tolmaǵan jas ustaldy. Olardyń 40-y esirtki satqany úshin, 27-si asa iri mólsherde saqtaǵany úshin, 2-eýi esirtkini jarnamalap, nasıhattaǵany úshin jaýapqa tartyldy. Ustalǵandardyń arasynda 52 ul jáne 17 qyz bar.
«Qurmetti ata-analar men zańdy ókilder! Myna jaǵdaılar sizdi erekshe alańdatýy tıis: kenetten aqsha nemese qymbat zattardyń paıda bolýy, telefon men hat-habardaǵy jasyryndyq, túrli nysandardyń kúmándi skrınshottary. Esirtki aınalymynyń naqty belgileri — bul, eń aldymen, túıinshekter, paketter, ızolenta, elektrondy tarazy jáne ózge de zattar. Jasóspirimniń aınalasyna, bos ýaqytyn qalaı ótkizetinine nazar aýdarý kerek. Onyń áleýmettik jelilerde kimge jazylǵanyn, messendjerlerde kimmen senimdi qarym-qatynasta ekenin bilip otyryńyz», — dedi İİM nashaqorlyqqa qarsy is-qımyl komıteti basqarmasynyń bastyǵy Baqytjan Ámirhanov.