Qazaqstan İshki ister mınıstrligi ata-analarǵa balalardy, ásirese túngi ýaqytta, qadaǵalaýdy kúsheıtýge shaqyrdy. Sebebi kóptegen ata-ana jaýapkershilikke tartylǵan. Bul týraly infohub.kz saıty habarlaıdy.
Vedomstvonyń málimdemesinde erekshe nazar kámeletke tolmaǵandardyń túngi ýaqytta eresektersiz júrý faktilerine aýdarylǵan. Sońǵy jedel-profılaktıkalyq is-shara barysynda 25 myńnan astam kámeletke tolmaǵan anyqtaldy.
«Ata-analardyń nazaryn balalardyń qaıda júrgenin jáne ýaqytyn qalaı ótkizetinin qadaǵalaýdy kúsheıtýge, sondaı-aq ata-analyq mindetterdi tıisinshe oryndamaǵany úshin jaýapkershilikke tartylatynyn taǵy da eskertemiz», — delingen málimdemede.
Sonymen qatar bilim berý uıymdarynyń aınalasyndaǵy aýmaqtardyń jol ınfraqurylymyn retke keltirý jumystary júrgizildi. 3 myńǵa jýyq nusqama shyǵarylyp, olardy joıý boıynsha sharalar qoldanylýda.
İİM 40-tan astam laýazymdy tulǵanyń jaýapkershilikke tartylǵanyn atap ótti. Budan bólek, balalardy tasymaldaıtyn avtokólik quraldarynyń tehnıkalyq jaǵdaıy tekserildi.
«Osy múmkindikti paıdalanyp, balalardyń qaýipsizdigi úshin eń aldymen ata-analar jaýapty ekenin taǵy da eske salamyz. Balalardyń minez-qulqyn, emosıonaldyq jaı-kúıin kún saıyn qadaǵalap, alǵashqy alańdatarlyq belgiler baıqalsa, dereý polısıa organdaryna habarlaý mańyzdy. Balalar qaýipsizdigi boıynsha profılaktıkalyq jumys oqý oryndarynda da, kósheler men joldarda da jalǵasýda», — dedi İİM ákimshilik polısıa komıteti basqarmasynyń bastyǵy Asqat Dúısembekov.