Qazaqstan İshki ister mınıstrligi resmı málimdeme jasap, Kaspı teńizindegi oqý-jattyǵý kezinde 14 áskerı qyzmetshiniń qaza tabýyna baılanysty áleýmettik jelilerde taraǵan birneshe jalǵan aqparatty joqqa shyǵardy. Vedomstvo sondaı-aq jalǵan málimet taratqan azamattardy jaýapkershilikke tartqanyn habarlady, dep jazady infohub.kz saıty.
İİM-niń resmı Telegram-arnasynda Kaspıdegi 14 adamnyń ómirin qıǵan qaıǵyly oqıǵadan keıin jelide belsendi taraǵan feıkter týraly málimdeme jarıalandy.
Mınıstrliktiń dereginshe, D.S. jáne G.S. esimdi azamatshalar Facebook paraqshalarynda áskerı qyzmetshi A.A. týraly málimetter jarıalaǵan. Bul jazbalarda ol óz betinshe jaǵaǵa shyǵyp, sýǵa batyp bara jatqan joldasyn qutqarǵan, al onyń erligi men qutqarý jaǵdaılary ádeıi jasyrylyp otyr dep tujyrymdalǵan. Tekserý barysynda D.S. bul aqparatty alys týystarynan alǵany, al G.S. málimetterdi áleýmettik jelilerden kóshirip alyp, rastyǵyn teksermeı óz paraqshasynda jarıalaǵany anyqtaldy. Polısıa atap ótkendeı, bul málimetter shyndyqqa sáıkes kelmeıdi jáne Qazaqstan Respýblıkasy Qorǵanys mınıstrligi tarapynan resmı túrde joqqa shyǵarylǵan.
Aıta keteıik, bul rette merzimdi áskerı qyzmettegi matrostar Ahmetov A.A. jáne Maǵaýıa Á.A. týraly qaýesetterden keıin Qorǵanys mınıstrligi jasaǵan málimdeme týraly aıtylyp otyr. Ol kezde Qorǵanys mınıstrligi olar jaǵada oqý mindetterin oryndaǵan áskerı qyzmetshiler tobyna jatatynyn, al olarǵa qatysty qaýesetter feık ekenin habarlaǵan. İİM qosymsha aqparat retinde áleýmettik jelilerde taraǵan A.A.-nyń óz betinshe jaǵaǵa júzip shyqqany, sýǵa batyp bara jatqan joldasyn qutqarǵany, al onyń erligi týraly aqparat ádeıi jasyrylyp otyrǵany týraly málimetter shyndyqqa sáıkes kelmeıtinin qosty.
Sonymen qatar, İİM-niń málimetinshe, oqıǵa týraly jalǵan aqparat taratqan Shymkent turǵyny S.K. jáne Kókshetaý turǵyny K.O. anyqtaldy. S.K. Facebook paraqshasynda taǵy bir áskerı qyzmetshiniń qaza tapqany týraly jalǵan málimet jarıalap, onyń týystaryna qysym kórsetilip, olardan aqsha talap etilip otyr dep málimdegen. Óz kezeginde K.O. Mańǵystaý oblysynda taǵy bir áskerı qyzmetshiniń qaza tapqany týraly jalǵan aqparat jarıalaǵan, dep qosty İİM.
Sot sheshimimen atalǵan adamdar ákimshilik jaýapkershilikke tartylyp, 20 AEK (2026 jyly 86 500 teńge — red. eskertpesi) mólsherinde aıyppul salyndy.
Polısıa qazaqstandyqtardy taǵy da eskertti: jalǵan aqparat taratý, onyń ishinde bóten materıaldardy qaıta jarıalaý arqyly da, jaýapkershilikten bosatpaıdy. «Bógde derekkózge silteme jasaý azamattardyń quqyqtary men zańdy múddelerine nuqsan keltirýi múmkin tekserilmegen málimetterdi taratýǵa negiz bolmaıdy. Polısıa áleýmettik jeli qoldanýshylaryn aqparat ornalastyrýǵa jaýapkershilikpen qaraýǵa, taratylatyn málimetterdiń rastyǵyn tekserýge jáne rastalmaǵan aqparatty jarıalamaýǵa shaqyrady», — delingen málimdemede.
Eske salaıyq, 24 qyrkúıekte oqý-jaýyngerlik mindetti oryndaý barysynda aýa raıynyń kenetten kúrt nasharlaýy men ekpindi jeldiń saldarynan Kaspı teńizine 17 áskerı qyzmetshini alyp ketti, olardyń 14-i qaza tapty. Úsheýi qutqaryldy. Qaıǵyly oqıǵadan keıin Dáýren Qosanov qorǵanys mınıstri qyzmetinen bosatyldy. Onyń ornyna Aıdos Myrzahmetov taǵaıyndaldy.