Qazaqstanda mas kúıde kólik júrgizgeni úshin jaýapkershilikti jeńildetý bolmaıdy. Bul týraly ishki ister mınıstriniń orynbasary Igor Lepeha málimdedi. Ol qazirgi qatań sharalardyń ózi tártip buzýshylardy toqtatpaı otyrǵanyn atap ótti, dep habarlaıdy infohub.kz saıty.
Mınıstr orynbasarynyń aıtýynsha, jazany jeńildetý týraly áńgime mas júrgizýshiler sany turaqty azaıǵan jaǵdaıda ǵana oryndy bolar edi. Alaıda Lepeha keltirgen sońǵy jyldardaǵy statısıka keri úrdisti kórsetip otyr.
«Jaǵdaı kúrt jaqsaryp kele jatyr desek, onda birdeńe talqylaýǵa bolar edi. Myna statısıkany aıtaıyn. 2023 jyly mas kúıde kólik júrgizgen 22 myń júrgizýshini toqtattyq. 2024 jyly — 24,7 myń, al 2025 jyly — 25,3 myń. Iaǵnı biz aıtyp otyrmyz: sondaı qorqynyshty shara, biraq ol adamdardy toqtatpaıdy, adamdar báribir kólik júrgize beredi», — dedi Lepeha.
Onyń dereginshe, 2026 jyldyń tolyq emes kezeńinde polısıa mas kúıdegi 17,1 myń júrgizýshini anyqtaǵan. Mınıstr orynbasary jazany jeńildetý mundaı quqyq buzýshylyqtardyń kóbeıýine ákelýi múmkin dep esepteıdi.
Sonymen qatar Igor Lepeha mas júrgizýshiler qatysqan jol-kólik oqıǵalary týraly derekterdi keltirdi: ótken jyly osyndaı 670 apat bolyp, olarda 56 adam qaza tapqan.
«Mas júrgizýshiler qaǵyp ketken adamdardyń týystarynan suraıyq. Olar bul máselelerge qalaı qaraıdy? Raqymshylyqqa, qysqartýǵa, jeńildetýge? Bizdiń ustanymymyz ózgermeıdi. Bas bostandyǵynan aıyrý merzimin qysqartý týraly máseleni biz eshbir jaǵdaıda kótermeımiz», — dedi Igor Lepeha.
Buǵan deıin «Kýrsıv» Qazaqstanda erejelerdi únemi buzyp, aıyppuldardy elemeıtin júrgizýshilerge baldyq júıe engizilmek ekenin jazǵan bolatyn. Qaıtalap aýyr quqyq buzýshylyq jasaǵandardyń júrgizýshi kýáligi bir jylǵa toqtatylýy múmkin.