Qazaqstan İshki ister mınıstrligi jol qozǵalysy týraly zańnamaǵa engizilgen jańa túzetýlerge qatysty taraǵan qate túsinikterdi joqqa shyǵaryp, júrgizýshiler úshin eshqandaı qosymsha búrokratıalyq rásimder engizilmeıtinin, kerisinshe, kóptegen prosester sandyq derek almasý arqyly jeńildeıtinin túsindirdi, dep habarlaıdy infohub.kz.
Eń ózekti máselelerdiń biri – mindetti medısınalyq tekserý. Vedomstvoda bul talaptyń jańalyq emes ekenin, ol 2014 jyly «Jol qozǵalysy týraly» Zań kúshine engennen beri qoldanylyp kele jatqanyn túsindirdi. Endi Densaýlyq saqtaý mınıstrligi men İshki ister mınıstrligi arasynda aqparattyq júıelerdiń ıntegrasıasy jolǵa qoıyldy, sonyń arqasynda júrgizýshilerdiń mindetti medısınalyq tekserýden ótkeni týraly málimetter avtomatty túrde beriletin bolady.
«Júrgizýshilerdiń medısınalyq tekserýden ótý normasy jańa emes. Ol 2014 jyldan bastap „Jol qozǵalysy týraly" Zań kúshine engennen beri qoldanylyp keledi. Densaýlyq saqtaý mınıstrligi men İshki ister mınıstrligi arasynda derekqorlar ıntegrasıasy júrgizildi», — dedi İİM ákimshilik polısıa komıteti tóraǵasynyń orynbasary Kúráláı Karına.
65 jastan asqan júrgizýshiler men múgedektigi bar azamattarǵa qatysty jaǵdaı jeke túsindirildi. Olarǵa eki jylda bir ret standartty júrgizýshilik medısınalyq tekserýden ótý jetkilikti. Osydan keıin aqparat İİM júıesinde avtomatty túrde kórinis tabady. Qosymsha anyqtamalar, mekemelerge júginý nemese polısıaǵa jeke habarlaýdyń qajeti joq.
«Eshqandaı jańa búrokratıalyq rásimder engizilmeıdi. Barlyǵy barynsha qarapaıym, yńǵaıly jáne júrgizýshilerge esh qıyndyq týdyrmaıdy», — dep atap ótti İİM ókili.
Vedomstvo sondaı-aq áleýmettik jelilerdiń paıdalanýshylary men aqparattyq alańdardyń ıelerine aqparatty jarıalamas buryn tekserýdi surap, azamattardy jańylystyratyn jalǵan aqparat taratqany úshin jaýapkershilik týraly eskertti.