Tesla jáne SpaceX kompanıalarynyń negizin qalaýshy Ilon Mask jańa aýqymdy ınfraqurylymdyq bastama kóterdi: onyń The Boring Company kompanıasy Tehas shtatyndaǵy Ostın men San-Antonıo qalalaryn jalǵaıtyn Hyperloop jerasty magıstraliniń tujyrymdamasyn usyndy, dep habarlaıdy infohub.kz saıty.
TechCrunch basylymynyń jazýynsha, sóz eki iri qalany qosatyn joǵary jyldamdyqty tonnel týraly bolyp otyr. Olardyń arasy shamamen 130 shaqyrymdy quraıdy.
Kompanıanyń tusaýkeserine sáıkes, joba – ishinde jolaýshylar men kólik kapsýlalary joǵary jyldamdyqpen, ishinara vakým jaǵdaıynda qozǵala alatyn jerasty tonneli.
The Boring Company mamandarynyń aıtýynsha, jobany júzege asyrý Ostın men San-Antonıo arasyndaǵy jol júrý ýaqytyn sanaýly mınýtqa qysqartyp, jerústi avtomobıl trassalaryndaǵy júktemeni aıtarlyqtaı azaıtady jáne óńirdiń kólik baılanysyn jaqsartady.
Ilon Mask Hyperloop joǵary jyldamdyqty vakýmdyq poıyzdar ıdeıasyn alǵash ret 2013 jyly jarıalaǵan bolatyn. Sodan beri tujyrymdama AQSH-tyń túrli baǵyttary úshin birneshe ret talqylandy, alaıda ázirge kompanıa Las-Vegastaǵy jumys istep turǵan keshen sıaqty Tesla elektromobılderine arnalǵan Loop jerasty tonnelderin salýǵa basa nazar aýdaryp otyr.
Tehastaǵy usynylǵan joba talqylaýdyń bastapqy kezeńinde tur jáne jergilikti bılikpen kelisýdi, ekologıalyq áserdi baǵalaýdy jáne qarjylandyrý máselelerin sheshýdi talap etedi.