SpaceX компаниясының негізін қалаушы Илон Маск Украинаға арналған Starlink спутниктік байланысының жұмысын шектегенін мәлімдеді. Себебі украин әскерилері бұл жүйені дрондармен шабуыл жасауға пайдаланған. Кәсіпкер бұл туралы X әлеуметтік желісінде жазба жариялады, деп хабарлайды infohub.kz сайты.
Масктың айтуынша, азаматтық коммерциялық қызмет саналатын Starlink-ті адам өлтіру мақсатындағы дрон шабуылдарына қолдануға ешқашан рұқсат берілмеген. Ол Starshield — АҚШ үкіметі бақылайтын бөлек жүйе екенін, ол бойынша шешімді американ тарапы қабылдайтынын атап өтті.
«Украина әскерилері Starlink-ті пайдалану шарттарын бұзып, оны адам өлтіру мақсатындағы дрон шабуылдарына қолданды. Бұл олқылық өткен аптада жабылды», — деді кәсіпкер.
Маск Starlink Украина қорғанысы үшін аса маңызды екенін қосып айтты, өйткені бұл — кем дегенде қазіргі таңда басып-жаншуға немесе жоюға келмейтін жалғыз жүйе. «Егер Starlink өшірілсе, Украинаның майдан шебі бірден құлайды. Бұл қорқыту емес, жай ғана ахуалдың мәлімдемесі. Сонымен қатар Starlink соғыстың алғашқы күндерінде Ресейдің Украинаны басып алуына жол бермеуде шешуші рөл атқарды, өйткені қалған барлық байланыс құралдарын Ресей жойып немесе басып-жаншып тастаған еді», — деп келтіреді оның сөзін NUR.KZ.
Бұдан бөлек, SpaceX негізін қалаушы компания Украинаны қорғау үшін Жердегі кез келген жеке компаниядан әлдеқайда көп іс жасағанын атап өтті. «Сонымен бірге шексіз қантөгісті жақтап, қақтығыстың шынайы шешімін ұсынбайтын екіжүзді милитарист-қаскөйлерге деген менде тек жиіркеніш бар», — деді кәсіпкер.
Еске салайық, 21 қазанда Starlink спутниктік байланысындағы шектеулер украин әскерилеріне дрондардың бір бөлігін пайдалануға кедергі келтіретіні белгілі болды. The Wall Street Journal газеті SpaceX басшысы Илон Масктың бұл мәселені АҚШ президенті Дональд Трамппен жеке талқылағанын жазған. 23 қазанда Дональд Трамп Маск Украинаның Starlink спутниктік жүйесінің әскери нұсқасына — Starshield-ке қолжетімділігін қалпына келтіргенін мәлімдеді. Алайда Киевте шектеулер әлі де күшінде деп тұжырымдай берді.