Қытай автокөлік нарығы ондаған электромобиль ұсынады, олардың ішінен керегін таңдау оңай емес. Тәуелсіз импорттаушы өкілі Назар Пономарев төрт электрокроссоверді зерттеп, сатып алу кезінде нені ескеру керегін түсіндірді. Оның тізіміне Toyota bZ3X, BYD Yuan UP, Leapmotor A10 және Qiyuan Q05 енді, деп хабарлайды infohub.kz сайты.
Тізімдегі ең үлкен әрі қуатты SUV — Toyota bZ3X, бағасы $21,8 мың (шамамен 10 млн теңге). Электрқозғалтқышы 204 а.к. қуат береді, ал 58 кВт·сағ батареясы 520 км жүріс қамтамасыз етеді. Кроссоверде кең салон, панорамалық шатыр, 360 градус камералар, адаптивті круиз-контроль және Yamaha аудиожүйесі бар.
Дегенмен көліктің кемшілігі де жоқ емес: мультимедиа қытай тілінде жұмыс істейді, ал оны орыс тіліне бейімдеу, Пономаревтің айтуынша, бәсекелестерге қарағанда қиынырақ әрі қымбатырақ болады. Тағы бір кемшілігі – багажнигі шағын.
BYD Yuan UP тізімдегі ең қолжетімді нұсқа болды, алайда төмен баға үшін қарапайым жинақтауға көнуге тура келеді. Базалық нұсқасы 95 а.к. электрқозғалтқышпен және 400 км жүріс қоры бар батареямен жабдықталған. Бірақ бағасы небәрі $15,5 мың, бұл шамамен 7,1 млн теңгеге тең. Ресми дилерлерде «Юань Ап» бағасы 10 млн теңгеден басталады.
Сонымен қатар, тіпті базалық нұсқада 360 градус камералар, адаптивті круиз-контроль және басқа да көмекші жүйелер бар. Салон толығымен жасанды былғарымен қапталған, ал мультимедиа ағылшын тілінде жұмыс істейді.
Leapmotor A10 122 а.к. қозғалтқышпен және CLTC бойынша 500 км жүріс қоры бар 53 кВт·сағ батареямен жабдықталған. Топтық нұсқасында 360 градус камералар, лидар, панорамалық шатыр, орындықтар мен рульді жылыту, сондай-ақ 12 динамик бар. Бағасы – $14,7 мыңнан (≈6,7 млн теңге).
Модельдің басты кемшілігі – жылу сорғысының жоқтығы. Пономарев мұны суық климатта пайдалану үшін елеулі кемшілік деп санайды, өйткені қыста онсыз салонды жылытуға батарея энергиясы көбірек жұмсалып, жүріс қоры азаяды.
Дилердің фавориті Changan-ның Qiyuan Q05 моделі болды. Рестайлингтен кейін паркетник 163 а.к. электрқозғалтқыш пен 52 кВт·сағ батареяны сақтап қалды, ал мәлімделген жүріс қоры 506 км. Көлік $18,5 мыңға түседі, теңгемен бұл 8,5 млн-нан сәл аз.
Сонымен қатар Q05-те жылу сорғысы, сымсыз қуаттау, панорама, жылытқыштар, 360 градус камералар, адаптивті круиз-контроль және орыс тіліне бейімделетін мультимедиа бар. Пономаревтің пікірінше, жабдықтау, сипаттамалар мен бағаның үйлесімі Q05-ті төртеуінің ішіндегі ең теңгерімді нұсқа етеді.
Жеке импорттаушылар әдетте бағаны жеткізу, кедендік ресімдеу, утильсбор, сатушыға комиссия және көлікті тіркеу шығындарынсыз жариялайтынын ескеру маңызды. Көліктің түпкілікті құны 40–50%-ға өсуі мүмкін.
Бұған дейін Курсив Авто электромобильдер мен іштен жану қозғалтқышты автомобильдер арасындағы қарсыласудың басты нюансы туралы айтқан болатын.