Úndistannyń soltústigindegi Ýttarakhand shtatyndaǵy gıdroenergetıka nysanynda salynyp jatqan týnel opyrylyp, keminde 7 jumysshy qaza tapty. Bul týraly juma kúni resmı ókilder málimdedi, dep habarlaıdy infohub.kz saıty.
Chamolı aýdanyndaǵy Vıshnýgad-Pıpalkotı GES jobasynyń týnneline keshki ýaqytta sý men qoqys kenetten kirip ketken. Aýdan ákimi Gaýrav Kýmardyń aıtýynsha, qutqarý jumystary dereý bastalǵan.
Týnelde 22 adam jumys istep jatqan. Ýttarakhand shtatynyń bas mınıstri Pýshkar Sıngh Dhamıdiń habarlaýynsha, olardyń 12-si tirideı qutqaryldy, taǵy úsheýi izdestirilýde.
Ulttyq jáne shtattyq apattarǵa qarsy qyzmet, Úndi-Tıbet shekaralyq polısıasy men órt sóndirý bólimsheleriniń qutqarýshylary sý deńgeıi kóterilip, qoqys jınalýyna qaramastan izdeýdi jalǵastyrýda.
Ulttyq apattarǵa qarsy qyzmet tobynyń komandıri Amrıt Lal Mına: «Bizdiń komanda oqıǵa ornyna jetip, operasıany bastaǵanda, týnel ishinde sý kóp boldy, sondaı-aq qabyrǵalardan da sý aǵyp jatty. Sodan beri sý deńgeıi aıtarlyqtaı kóterildi», — dedi.
Úndistanda qurylys apattary jıi kezdesedi, sebebi ınfraqurylymnyń qarqyndy damýy taý jynystarynyń turaqsyzdyǵymen, qurylystaǵy kemshiliktermen, ekstremaldy aýa raıymen jáne qaýipsizdik standarttarynyń saqtalmaýymen qatar júredi.
Gımalaı aımaǵynda taýlardyń synǵyshtyǵy, seısmıkalyq belsendilik pen jerasty jaǵdaılarynyń boljamsyzdyǵy týnel jobalaryn erekshe qaýipti etedi. Aqpan aıynda kórshi Meghalaıa shtatyndaǵy kómir shahtasynda bolǵan jarylystan keminde 18 jumysshy qaza tapqan. 2023 jyly Ýttarakhandtyń soltústigindegi týneldiń bir bóligi opyrylyp, 41 jumysshy 17 kún boıy qalyp, keıin qutqarylǵan edi.