Indonezıanyń 17 jastaǵy turǵyny Rýdıansa Borneo aralyndaǵy orman órtterin sóndirýge kómektesip, órtpen Sýpermen kostúmimen kúresedi. Jas sýperqaharmannyń beınejazbalary áleýmettik jelilerde mıllıondaǵan kórilim jınady, dep habarlaıdy infohub.kz.
Rýdıansa ákesi uıymdastyrǵan erikti órt sóndirý tobyna qosyldy. Bir kúni jasóspirim ákesiniń órt sóndirýge daıyndalyp jatqanyn kórip, onymen birge barýdy uıǵardy. Endi olar birge Palangkaraı aımaǵyndaǵy tútindegen batpaqtar men janǵan ósimdikter arasynda jumys isteıdi. Jasóspirim shyqqanda óziniń súıikti sýperqaharmany Sýpermenniń kostúmin kıedi, dál osy kıimde ol áleýmettik jelilerge taraǵan beınejazbaǵa túsken.
Rýdıansanyń aıtýynsha, ol jergilikti turǵyndarǵa kómekteskenine qýanyshty. Bolashaqta jasóspirim orman reındjeri bolýdy armandaıdy, al qazir basqa órt sóndirýshiler men eriktilerdi órtpen kúresti jalǵastyrýǵa shaqyrady.
Rýdıansanyń janǵan ormanǵa shlangpen sý búrkip jatqan beınejazbasy áleýmettik jelilerde tez tarap, mıllıondaǵan kórilim jınady. Tipti Indonezıanyń orman sharýashylyǵy mınıstri jasóspirimge nazar aýdaryp, ony «Orman qaharmany» dep atady.
Jigittiń ákesiniń aıtýynsha, bıylǵy maýsym top qurylǵan 2020 jyldan bergi eń aýyr maýsym boldy. Ásirese sý máselesi ótkir tur: qýańshylyqqa baılanysty eriktiler paıdalanatyn qudyqtar men basqa da sý kózderi tartylyp qaldy.
Qańtardan shildege deıin Indonezıadaǵy órt 200 myń gektardan astam jerdi joıdy. Bul Djakarta aýmaǵynan shamamen úsh ese úlken. El bıligi órttiń taralýymen kúresý úshin qosymsha kúsh pen avıasıany jumyldyrdy.
Tútin Indonezıa Malaızıa jáne Brýneımen bólisetin Borneonyń bir bóligin jaýyp tastady. Al El-Nıno qubylysyna baılanysty qýańshylyq jańa órtterdiń shyǵý qaýpin arttyryp, olardy toqtatýǵa tyrysqandardyń jumysyn qıyndatady.