Indonezıada Iava teńizinde jolaýshylar kemesi aýdarylyp, alty adam qaza tapty, taǵy 130 adam iz-túzsiz joǵalyp ketti. Qutqarý jumystary áli jalǵasyp jatyr, dep habarlaıdy infohub.kz saıty.
Indonezıanyń izdeý-qutqarý qyzmeti Basarnas málimdeýinshe, bortynda 243 jolaýshy men ekıpaj múshesi bolǵan «Virgo Transport 8» kemesi jeksenbi kúni tańerteń operatorymen baılanysyn úzgen. Qazirgi derekter boıynsha 107 adam qutqaryldy. Kemede 213 jolaýshy jáne 30 ekıpaj múshesi bolǵan.
Keme senbi kúni Iava aralyndaǵy Sýrabaıa qalasynan shyǵyp, Borneo aralyndaǵy Bandjarmasın port qalasyna bet alǵan. Indonezıa Kólik mınıstrligi kemeniń aýdarylǵanyn rastady.
Bandjarmasındegi jergilikti izdeý-qutqarý keńsesiniń basshysy I Pýtý Sýdaıananyń aıtýynsha, keme qatty aýa raıyna tap bolǵan. Kemeniń sońǵy belgili orny Iava teńizinde, Bandjarmasınnen shamamen 81 teńiz mılásy (shamamen 150 km) qashyqtyqta boldy, dep habarlady AFP aqparat agenttigi.
Aımaqta qutqarý kemeleri men tikushaq izdeý júrgizip jatyr. Sýdaıananyń sózinshe, bıiktigi 2,5 metrge jetetin tolqyndar qutqarý jumystaryna kedergi keltirip otyr. «Kemeler úshin bul óte qaýipti. Tipti uzyndyǵy 40 metr bolatyn Basarnas kemesiniń ózi úlken táýekelge ushyrap otyr», — dedi Sýdaıana jýrnalıserge.
Al Jazeera tilshisi Djessıka Vashıngton Indonezıa astanasy Djakartadan habarlaýynsha, bılik apattyń sebebin áli anyqtaǵan joq. Tergeý júrip jatyr, mamandar aýa raıy men tehnıkalyq aqaýlar sıaqty faktorlardy qarastyryp jatyr.
17 myń araldan turatyn Indonezıa halqy paromdardy negizgi kólik túri retinde paıdalanady, teńiz joldary áýe qatynasyna qaraǵanda arzanyraq ári qoljetimdi.
Ótken aıda Balı men Lombok aralyǵynda júzgen paromdaǵy órtten bir adam qaza taýyp, beseýi iz-túzsiz joǵalǵan. Shildede Sýlavesı aralynyń ońtústigindegi Selaıar aralynyń mańynda 70-ten astam adamdy tasyǵan parom sýǵa batqan.