Ulttyq ekonomıka mınıstri Serik Jumanǵarın úkimet otyrysynda eldiń 2027-2029 jyldarǵa arnalǵan áleýmettik-ekonomıkalyq damý boljamyn tanystyrdy, dep habarlaıdy infohub.kz saıty.
UEM basshysy boljam álemdik ekonomıkanyń damý perspektıvalary men syrtqy naryqtardaǵy konúnktýrany eskere otyryp jasalǵanyn atap ótti. Onyń aıtýynsha, syrtqy qıyndyqtar saqtalǵanymen, Qazaqstan ekonomıkasy ósýin jalǵastyrady. Negizgi senarı boıynsha, 2027-2029 jyldary JİÓ-niń ortasha jyldyq naqty ósimi 5%-dan joǵary deńgeıde boljanýda. Nomınaldy JİÓ 2027 jyly 199,3 trln teńgeden 2029 jyly 245 trln teńgege deıin ósedi.
Ekonomıkanyń ósýi munaı emes sektorlardaǵy óndiristiń ulǵaıýymen qamtamasyz etiledi. Inflásıanyń boljamdy dálizi 2027 jyly 7,5-9,5%, 2028-2029 jyldary 6-8% deńgeıinde belgilendi. Makroboljamdy eskere otyryp, respýblıkalyq búdjettiń kiristeri 2027 jyly 19,9 trln teńgeni, 2028 jyly 21,7 trln teńgeni, 2029 jyly 23,4 trln teńgeni quraıdy dep kútilýde.
Memlekettik qarjynyń turaqtylyǵyn qamtamasyz etý úshin búdjet tapshylyǵy 2027 jyly JİÓ-ge shaqqanda 2,3% deńgeıinde belgilenip, 2029 jyly JİÓ-niń 0,4%-yna deıin tómendeıdi. Munaı emes tapshylyq JİÓ-niń 5,3%-ynan 2,5%-yna deıin qysqarady, dep atap ótti Jumanǵarın.