Qazaqstandaǵy jyldyq ınflásıa sońǵy bir jarym jyldaǵy eń tómengi deńgeıge jetip, 9,8%-ti qurady. Bul — 2025 jylǵy aqpannan bergi eń tómengi kórsetkish, sol kezde baǵa ósimi 9,4% deńgeıinde tirkelgen edi. Bir aı ishinde tutyný baǵalary 0,6%-ke, al jyl basynan beri 6,4%-ke ósti, dep habarlaıdy infohub.kz saıty.
Ulttyq statısıka búrosynyń (USB) derekterine sáıkes, tamyz aıynda tutyný baǵalarynyń ındeksi ótken jyldyń sáıkes kezeńimen salystyrǵanda 109,8%-ti qurady, bul jyldyq ınflásıanyń 9,8% deńgeıinde ekenin kórsetedi. Inflásıanyń baıaýlaýyna negizinen maýsymdyq kókónister men jemister baǵasynyń tómendeýi áser etti. Tamyzda kartop 12,3%-ke, tátti burysh 11,9%-ke, qyryqqabat 9,7%-ke, júzim 8,0%-ke, pıaz 7,7%-ke, alma 5,1%-ke, sábiz 5,0%-ke, lımon 4,7%-ke, qyzylsha 3,6%-ke arzandady. Sondaı-aq almurt (1,8%) pen qıar (1,5%) baǵasy da tómendedi.
Azyq-túlik emes taýarlar arasynda paıdalanylǵan jeńil avtokólikter 5,3%-ke, planshetter 5,0%-ke, medısınalyq maskalar 2,9%-ke, medısınalyq termometrler 1,9%-ke, elektr ettartqyshtar men balalar jórgekteri 0,8%-ke arzandaǵany baıqaldy.
Jalpy bir aı ishinde azyq-túlik taýarlary 0,1%-ke arzandasa, azyq-túlik emes taýarlar 0,8%-ke qymbattady, al qyzmet kórsetý baǵasy 1,2%-ke ósti. Jyldyq kórsetkishte azyq-túlik emes taýarlar 11,4%-ke, azyq-túlik taýarlary 9,5%-ke, aqyly qyzmetter 8,9%-ke qymbattady.
Ótken jyldyń tamyzymen salystyrǵanda jekelegen jemis-kókónis ónimderiniń baǵasy tómendeýin jalǵastyrdy. Baklajan 46,8%-ke, qıar 39,9%-ke, qyzanaq 13,6%-ke, alma 10,6%-ke, sarymsaq 7,2%-ke, mandarın 5,9%-ke, qyryqqabat 5,2%-ke, banan 4,2%-ke, apelsın 2,6%-ke arzandady. Azyq-túlik emes taýarlar arasynda jyl ishinde otandyq qurastyrylǵan jańa avtokólikter 16,9%-ke, elektrburǵylar men buraǵyshtar 8,0%-ke, kondısıonerler 7,6%-ke, medısınalyq bıntter 3,1%-ke qymbattady.
Ulttyq statısıka búrosynda ınflásıa deńgeıin sıpattaıtyn tutyný baǵalary ındeksi aı saıyn esepteletinin túsindirdi. Baqylaýlar barlyǵy 537 pozısıa boıynsha taýarlar men qyzmetterdiń baǵalary men tarıfterine júrgiziledi.