Jetim balalar men ata-anasynyń qamqorlyǵynsyz qalǵan balalar turǵyn úı bólý kezinde jeke kvotaǵa, jaldamaly páterlerge jáne jeńildikti ıpotekaǵa sene alady. Otbasy bankinde bul sanattaǵy azamattarǵa qandaı sharttar qoldanylatynyn aıtyp berdi, dep habarlaıdy infohub.kz saıty.
Zańǵa sáıkes, jetim balalarǵa bólinetin turǵyn úıdiń jalpy kóleminiń 20% beriledi. Mysaly, ákimdik 100 páter bólse, onyń 20-sy jetim balalarǵa kepildikpen arnalady. Turǵyn úıge muqtaj retinde esepke týǵannan bastap turýǵa bolady, al eger bala kámeletke tolmaǵan kezde ata-anasynan aıyrylsa, ol 29 jasqa deıin kez kelgen ýaqytta tirkele alady. Shuǵyl áskerı qyzmetke shaqyrylǵan jaǵdaıda bul jas shegi qyzmet merzimine uzartylady.
Turǵyn úı bólý kezinde esepke qoıylǵan kún, sanattyń basymdylyǵy jáne tabys deńgeıi eskeriledi. Tekserý avtomatty túrde júrgiziledi – Otbasy banki 15 memlekettik derekqormen ıntegrasıalanǵan.
Tabys mólsherine qaraı kezekte turǵan adam qandaı kómek alatyny anyqtalady. Az tabys kezinde jaldaý aqysyn sýbsıdıalaý jáne jaldamaly turǵyn úı qoljetimdi. Tabysy nesıege qyzmet kórsetýge múmkindik beretinderge jeńildikti ıpoteka usynylady.
2026 jyly eń tómengi kúnkóris deńgeıi 50 851 teńgeni quraıdy. Jaldaý aqysyna sýbsıdıa alý úshin otbasynyń árbir múshesiniń sońǵy alty aıdaǵy ortasha tabysy bul somadan aspaýy kerek.
Jaldamaly turǵyn úı úshin shek otbasy músheleriniń sanyna baılanysty. Eger olar úsh nemese odan kóp bolsa, tabys bir adamǵa shaqqanda eki eń tómengi kúnkóris deńgeıinen aspaýy tıis. Eki adamǵa deıingi otbasy úshin shek – bir adamǵa 3,5 EKD, bir adamǵa – 5,5 EKD.
2% jeńildikti ıpoteka bir adamǵa shaqqanda tabys bes eń tómengi kúnkóris deńgeıine deıin – 254 255 teńge bolǵanda qoljetimdi. 5% ıpoteka úshin shek alty EKD – 305 106 teńge deńgeıinde belgilengen.
Tabys týraly anyqtama jınaýdyń qajeti joq. Olardyń kózderi men mólsheri Otbasy bankiniń jáne Eńbek resýrstaryn damytý ortalyǵynyń servısi arqyly avtomatty túrde tekseriledi.