Irak premer-mınıstri Álı ál-Záıdıdiń AQSH-qa sapary barysynda eki el arasynda ondaǵan kelisim men seriktestik ornatyldy. Olardyń kóbi munaı sektoryna qatysty. Barlyǵy 48 kelisimge, ózara túsinistik memorandýmyna, yntymaqtastyq jáne seriktestik deklarasıasyna qol qoıyldy, — dep habarlaıdy infohub.kz.
Bul kelisimder Iraktyń munaı jáne elektr energetıkasy mınıstrlikteriniń EksonMobıl, KBR, DjıI Vernova, Shell jáne Hallıberton sekildi iri amerıkalyq kompanıalarmen yntymaqtastyǵyn qamtıdy. Sondaı-aq, Irak pen Sırıa arasyndaǵy iri shıki munaı qubyryn salýǵa qatysty birneshe kelisim jasaldy. Irak spýtnıktik baılanys salasyndaǵy álemdik kóshbasshy Starlınkpen qyzmetterdi engizý týraly da kelisimge qol qoıdy.
Aldyn ala kelisimder Vashıngtondaǵy AQSh Saýda palatasynda ótken AQSH-Irak bıznes samıtinde jasaldy. Bul Baǵdadtyń AQSH-Izraıldiń Iranǵa soǵysy saldarynan keme qatynasy men munaı eksporty qatty buzylǵan Úrmúz buǵazyna táýeldilikti azaıtýǵa umtylýymen túsindiriledi.
Irak pen Sırıa uzaq ýaqyt boıy jumys istemeı turǵan Irak-Sırıa munaı qubyryn qalpyna keltirý týraly yntymaqtastyq kelisimine qol qoıdy. Bul qubyr soltústik Iraktaǵy munaıǵa baı Kırkýk aımaǵynan Sırıanyń Jerorta teńizindegi Banıas portyna deıin sozylady. Iraktyń memlekettik aqparat agenttiginiń habarlaýynsha, jobany iri amerıkalyq energetıkalyq kompanıa Shevron júzege asyrady.
AQSh Memlekettik departamenti Irak pen Sırıanyń qubyrdy qalpyna keltirý josparyn qoldaıtynyn bildirdi. Departament málimdemesinde «amerıkalyq basqaratyn halyqaralyq konsorsıým» tehnıkalyq jáne qarjylyq aspektilerdi oryndaıtyny aıtylǵan. Qubyr qalpyna keltirilgennen keıin bastapqy kezeńde táýligine 2 mıllıon barel shıki munaıdy tasymaldaı alady. Bul joba «Irak munaı óndirisin Jerorta teńiziniń eksporttyq naryqtarymen jáne odan ári baılanystyratyn mańyzdy energetıkalyq dáliz» retinde sıpattaldy.
AQSH-tyń Túrkıadaǵy elshisi Tom Barrak Iraktyń sońǵy munaı qubyry kelisimderi «Úrmúz buǵazyn ekinshi josparǵa ysyratyn» baǵdarlamaǵa ákeletinin aıtty. Qubyr jobasynan basqa, Shevron Irakpen munaı óndirisin arttyrýǵa baǵyttalǵan taǵy eki kelisimge qol qoıdy. Korporatıvtik bıznesti damytý jónindegi prezıdent Djeık Spırıngtiń sózinshe, bul kelisimder óndiristi ulǵaıtýǵa baǵyttalǵan.
Jalpy, Iraktyń amerıkalyq kompanıalarmen aldyn ala kelisimderi energetıka, densaýlyq saqtaý jáne tehnologıa salalaryn qamtıdy, olardyń quny 60 mıllıard dollardan astam, — dep habarlady Reuters. Bıznes samıtinde ál-Záıdı: «Biz ashyq esik saıasatyn ustanamyz. Jobasy bar kez kelgen adam bizge kelip, sóılese alady. Biz eshkimge qıyndyq týdyrmaımyz»,— dedi.