Irak úkimeti Batys munaı kompanıalarymen ondaǵan kelisim jasasty. Olardyń ishinde Irak munaıyn Urmuz buǵazynan tys eksporttaýǵa múmkindik beretin energıa jetkizý baǵytyn qalpyna keltirý de bar, dep habarlaıdy infohub.kz saıty.
Aldyn ala kelisimder juma kúni Vashıngtondaǵy AQSh Saýda palatasynda ótken AQSH-Irak iskerlik samıtinde jasaldy. Bul qadam Iraktyń Urmuz buǵazyna táýeldiligin azaıtýǵa umtylýymen baılanysty, óıtkeni AQSH-Izraıldiń Iranǵa qarsy soǵysy saldarynan buǵazdaǵy tranzıt qatty buzylǵan.
Irak pen Sırıa birlese otyryp, Iraktyń munaı óndiriletin Kırkýk aımaǵynan Sırıanyń Jerorta teńizindegi Banıas portyna deıin sozylatyn uzaq ýaqyt boıy paıdalanylmaǵan Irak-Sırıa shıki munaı qubyryn qaıta jańǵyrtý jónindegi yntymaqtastyq kelisimine qol qoıdy. Iraktyń memlekettik aqparat agenttiginiń habarlaýynsha, jobany iri AQSh energetıkalyq kompanıasy Shevron júzege asyrady.
AQSh Memlekettik hatshylyǵy málimdemesinde Irak pen Sırıanyń qubyrdy qalpyna keltirý josparyn quptaıtynyn jáne jobanyń «tehnıkalyq jáne qarjylyq aspektilerin AQSh bastaǵan halyqaralyq konsorsıým oryndaıtynyn» aıtty. «Qaıta qalpyna keltirýden keıin bul kúrdeli joba táýligine 2 mıllıon barel shıki munaı ótkizý qabiletine ıe bolady», — delingen hatshylyq málimdemesinde. Qubyr «Iraktyń munaı óndirisin Jerorta teńizi naryqtaryna jáne odan ári jalǵaıtyn mańyzdy energıa dálizi» dep ataldy.
AQSH-tyń Túrkıadaǵy elshisi Tom Barrak Iraktyń sońǵy munaı qubyry kelisimderi «Urmuz buǵazyn ekinshi kezekte qaldyrýǵa» múmkindik beretin baǵdarlamaǵa ákeletinin aıtty. Shevron kompanıasynyń korporatıvtik bıznes damytý jónindegi prezıdenti Djeık Spırıngtiń aıtýynsha, kompanıa Irakpen munaı óndirýdi arttyrýǵa baǵyttalǵan taǵy eki kelisimge qol qoıǵan.
Sonymen qatar Irak úkimeti Ilon Maskke tıesili SpaceX kompanıasynyń Starlınk jobasymen elde resmı jumys isteýge arnalǵan kelisimge qol qoıdy. Reıter agenttiginiń habarlaýynsha, jalpy Irak sheneýnikteriniń energetıka, densaýlyq saqtaý jáne tehnologıa salalaryn qamtıtyn AQSh kompanıalarymen bastapqy kelisimderiniń quny 60 mıllıard dollardan asady.
Irak premer-mınıstri Álı ál-Zaıdı Vashıngton samıtinde sóılegen sózinde aýdarmashy arqyly: «Biz ashyq esik saıasatyn ustanyp otyrmyz. Kez kelgen jobasy bar adam bizge kelip sóılese alady. Biz eshkimge qıyndyq týdyrmaımyz», — dedi.