Iran Iordanıadaǵy Ál-Azrak áýe bazasyna shabýyl jasady. Saldarynan eki amerıkandyq áskerı qyzmetker qaza tapty, taǵy birnesheýi jaralandy. Bul týraly infohub.kz saıty habarlady.
AQSh Qarýly Kúshteriniń Ortalyq qolbasshylyǵynyń (CENTCOM) málimetinshe, shabýyl 17 shildede balıstıkalyq zymyrandar men ushqyshsyz ushý apparattarymen jasaldy. Eki qaza tapqannan bólek, bir áskerı habar-osharsyz ketti. Tórt jaraqattanǵan Iordanıa aýrýhanalaryna jetkizilse, jeńil jaralanǵan birneshe áskerı qyzmetker qaıtadan qyzmetke oraldy.
Osy oqıǵadan keıin AQSh áskeriniń Iranmen qaqtyǵystaǵy rastalǵan shyǵyny 16 adamǵa jetti.
Shabýyldyń nysany Ál-Azrak áýe bazasy boldy. The Wall Street Journal gazetiniń habarlaýynsha, amerıkandyq kúshter bul bazany aımaqtaǵy operasıalar úshin paıdalanǵan. Buǵan deıin Iran Islam revolúsıasy saqshylary korpýsy bazadaǵy birneshe amerıkandyq ushaqty joıǵanyn málimdegen edi.
AQSh prezıdenti Donald Tramp qaza tapqandardyń otbasyna kóńil aıtyp, olardyń qazasyn el úshin aýyr joǵaltý dep atady. Pentagon basshysy Pıt Hegset bolǵan oqıǵa AQSH-tyń áskerı áreketterdi jalǵastyrýǵa degen belsendiligin kúsheıte túsetinin aıtty.
Vashıngton men Tegeran arasyndaǵy shıelenis soǵys qımyldaryn toqtatý týraly kelisimderdiń buzylýynan keıin týyndady. Buryn qol jetkizilgen kelisimderge qaramastan, Ormýz buǵazy mańyndaǵy keıingi shabýyldar jańa soqqylarǵa jáne qarama-qaıshylyqtyń kúsheıýine ákeldi.
Tramp buǵan deıin Iranmen kelisimniń endi kúshinde joq ekenin, al elge qarsy áskerı operasıalar belgilengen maqsattarǵa jetkenshe jalǵasatynyn atap ótti.