Iran bas kóseminiń áskerı keńesshisi Mosen Rezaı AQSH-pen qaqtyǵysta qorǵanystan shabýylǵa kóshýge nıetti ekenin aıtty, dep habarlaıdy infohub.kz.
Tegeran aldaǵy eki-úsh kúnde Vashıngton soqqylardy toqtatpasa, qarqyndy shabýyldar bolatynyn eskertedi.
«AQSh shabýyldary aldaǵy eki-úsh kúnde jalǵassa, Iran Islam Respýblıkasynyń Qarýly kúshteri tejeý men jaýap qaıtarý kezeńinen shabýyl jáne tolyq joıylý fazasyna kóshedi», — dedi Rezaı ıran teledıdarynyń efırinde.
Ol mundaı jaǵdaıda Irannan tys jerdegi amerıkalyq áskerı bazalar men sarbazdar tikeleı nysanaǵa aınalatynyn atap ótti.
«Irannyń osy ýaqytqa deıin tózimdilik tanytýynyń sebebi — qaýipsizdik máseleleri men halyqaralyq qaqtyǵystardyń (mysaly, túrik-ızraıl, qytaı-taıvan jáne reseı-eýropa daǵdarystary) órshýine jol bermeý edi, biraq Vashıngtonnyń jańa qateligi aımaqty dál sol baǵytqa aparyp otyr», — dep qosty keńesshi.
Rezaı AQSh ákimshiligi soqqylar men kelissózderdi almastyratyn strategıanyń joıqyndyǵyn túsinýi kerek dep sanaıdy.
Eske salaıyq, AQSh pen Iran arasyndaǵy soqqy almasý bir aptadan astam buryn, Ankaradaǵy NATO samıti qarsańynda bastalǵan edi.
Keıin Aq úıdiń basshysy atysty toqtatý rejımi aıaqtalǵanyn, alaıda Vashıngton kelissózderge daıyn ekenin málimdedi. Al Iran Syrtqy ister mınıstriniń orynbasary Kazem Garıbabadı AQSH-pen beıbit kelisim shartynyń kúshin joıǵanyn atap ótti.