Iran men AQSh arasyndaǵy «Islamabad» dep atalatyn ózara túsinistik memorandýmy endi joq. Bul týraly Iran Syrtqy ister mınıstriniń orynbasary Kazem Garıbabadı málimdedi, dep habarlaıdy infohub.kz.
Iran dıplomatynyń aıtýynsha, AQSh barlyq mindettemelerin buzyp, Taıaý Shyǵysta soǵys qımyldaryn qaıta bastaǵan jáne «sheshýshi toıtarysqa» ushyraǵan.
«Biz qazir AQSh barlyq mindettemelerin buzyp, Islam Respýblıkasy Iranǵa qarsy áskerı jáne agresıalyq áreketterdi qaıta bastaǵan jaǵdaıda turmyz. Olar bizdiń erjúrek qarýly kúshterimizdiń sheshýshi jaýabyna tap boldy. Mundaı jaǵdaıda Iran eshqandaı mindetteme sezinbeıdi, óıtkeni, qarańyz, endi aıtýǵa bolatyn eshbir memorandým joq», — dedi Garıbabadı.
AQSh pen Iran arasyndaǵy ózara túsinistik memorandýmy 18 maýsymda qol qoıylǵan edi. Qujat barlyq maıdanda áskerı áreketterdi dereý jáne túpkilikti toqtatýdy jáne Ormýz buǵazynyń blokadasyn alyp tastaýdy kózdegen.
13 shildede The New York Times gazeti AQSh prezıdenti Donald Tramptyń Kongreske Irandaǵy soǵys qımyldaryn qaıta bastaý týraly habarlaǵanyn jazdy. 14 shildege qaraǵan túni AQSh Iranǵa qatarynan úshinshi ret shabýyl jasady. CENTCOM dereginshe, amerıkan áskeriniń operasıasy bes saǵatqa sozylyp, Tegerannyń Ormýz buǵazynda kemelerge shabýyl jasaý múmkindigin tómendetý maqsatynda ırandyq áskerı ınfraqurylymǵa baǵyttalǵan.
BAÁ Qorǵanys mınıstrliginiń málimetinshe, sol túni ırandyq qanatty zymyrandar Birikken Arab Ámirlikterine tıesili tankerlerge shabýyl jasady. Mombasa jáne Bahia kemeleri Omannyń aýmaqtyq sýlarynda zaqymdandy.
14 shilde keshinde AQSh Qarýly kúshteri Iranǵa jańa soqqylar berdi. CENTCOM-da bul soqqylar Tegerannyń Ormýz buǵazyndaǵy komersıalyq kemelerge shabýyl jasaý múmkindigin álsiretý úshin jasalǵanyn habarlady. Iran óz kezeginde Bahreın, Kýveıt jáne Iordanıadaǵy AQSh áskerı bazalaryna soqqy berdi.