Tegeran Vashıngton Islam Respýblıkasyna qarsy áskerı áreketterdi qaıta bastaýdy sheshti degen aqparatqa qol jetkizgenin málimdep, kez kelgen jańa shabýylǵa qatań jaýap berýge ýáde etti, dep habarlaıdy infohub.kz saıty.
NUR.KZ agenttiginiń «Anadolý» agenttigine silteme jasap habarlaýynsha, «Hatem ál-Ánbıa» ortalyq shtabynyń qolbasshylyǵy AQSh Iranǵa qaıta shabýyl jasaýdy sheship, aımaqtaǵy birqatar eldiń qoldaýyna ıe bolǵany týraly málimetter alǵanyn jarıalady.
«Eskertemiz: eger AQSh Iranǵa qatysty taǵy da qatelik jiberse, onyń aımaqtaǵy barlyq resýrstary men amerıkandyq kúshter ornalasqan jerler eshqandaı shekteýsiz ári aıyrmashylyqsyz aýyr soqqylardyń nysanasyna aınalady. Eger qatelik jiberseńiz, sizder aýyr soqqylardyń nysanasy bolasyzdar», — delingen osy aqparat alynǵannan keıin taratylǵan ırandyq áskerılerdiń málimdemesinde.
Iranda sondaı-aq aımaq elderi AQSH-pen birge Islam Respýblıkasyna qarsy agresıalyq áreketterge qatyssa, olar sybaılas retinde sanalatyny eskertildi.
Irannyń Qurlyq áskerleriniń qolbasshysy brıgadalyq general Álı Jahanshahı eldiń shekaralyq bólimsheleri yqtımal qaýip-qaterlerge daıyn ekenin málimdedi.