AQSH-tyń burynǵy áskerı laýazymdy tulǵalary Irannyń soqqylaryna baılanysty Shtattar jaqyn arada Taıaý Shyǵystaǵy áskerı qatysýyn qaıta qaraýy múmkin degen pikir bildirdi, dep habarlaıdy infohub.kz saıty.
Financial Times gazetiniń jazýynsha, amerıkandyqtardyń aımaqtaǵy qatysýy tórt onjyldyqqa jýyq ýaqyt boıy Parsy shyǵanaǵyndaǵy taramdalǵan áskerı bazalar tizbegine negizdelgen edi. Alaıda alty aıǵa sozylǵan soǵys barysynda Iran olardyń bolashaǵyn kúmánǵa aınaldyrdy. Tegeran amerıkandyq nysandarǵa qysqa qashyqtyqtaǵy zymyrandar men ushqyshsyz ushaqtarmen soqqy jasap, Iran jaǵalaýyna jaqyn ornalasqan nysandardyń qanshalyqty osal ekenin tez kórsetti.
Qazir áskerı sarapshylardyń pikirinshe, Donald Tramp ákimshiligi bul nysandardy qalpyna keltirýge mıllıardtaǵan dollar jumsaý kerek pe, álde jańa dáýir talabyna saı Taıaý Shyǵystaǵy áskerı qatysýyn qaıta qaraý kerek pe degen máseleni sheshýi tıis. Djons Hopkıns ýnıversıtetiniń ǵylymı qyzmetkeri Hel Brends AQSH-qa aımaqtaǵy áskerı kúshterin qaıta bólý qajet, óıtkeni áskerı nysandar, ásirese irileri, óte osal dep málimdedi. Onyń aıtýynsha, jaqyn arada AQSH-tyń áskerı kúshteriniń Parsy shyǵanaǵynan qaıta ornalasýyn baıqaýǵa bolady.
AQSh Qorǵanys mınıstrliginiń Taıaý Shyǵys jónindegi burynǵy orynbasary Dana Stroýl Parsy shyǵanaǵyndaǵy bazalardyń ashyq qurylymy — bul ótkenniń qaldyǵy, qazirgi qaqtyǵystarǵa onsha saı kelmeıdi dep atap ótti. AQSh Ulttyq qaýipsizdik keńesindegi Iran boıynsha burynǵy dırektor Neıt Sýonson Shtattar qıraǵan bazalardy qalpyna keltirgenshe, batysqa qaraı jyljýy múmkin dep sanaıdy.