Irlandıadaǵy tasjolda qarsy baǵytta kele jatqan kólikpen bolǵan apat saldarynan bes jasóspirim qaza taýyp, taǵy tórt adam aýyr jaraqat aldy. Bul týraly polısıa málimdedi. Garda (Irlandıa polısıasy) eki kólik qatysqan apat bolǵan jerden bes jasóspirimniń — barlyǵy er balalar — deneleri alynǵanyn rastady. Oqıǵa jeksenbi kúni tańerteń Kılder graftyǵyndaǵy M9 tasjolynda bolǵan.
Polısıanyń málimetinshe, ekinshi kólikte bolǵan úsh áıel (ekeýi 30-daǵy, biri 20-daǵy) jáne bir jasóspirim ul aýyr jaraqatpen aýrýhanada jatyr. Garda komısary Djastın Kellı eki kóliktiń betpe-bet soqtyǵysýyn «úreıli» dep sıpattap, keıbir jaǵdaılarda adamdar áleýmettik jelide laık jınaý úshin tasjolda qarsy baǵytta kólik júrgizetinin aıtty.
Ótken demalys kúnderi Dýblındegi M50 tasjolynda qarsy baǵytta kele jatqan kólikpen betpe-bet soqtyǵysý saldarynan toǵyz adam jaraqattanǵan bolatyn. Kellı jeksenbidegi apatqa qatysty: «Bul otbasy músheleri qaýipsiz júrip kele jatqanda, olarǵa qarsy baǵytta kele jatqan kólik soqtyǵysty. M50-degi jaqynda bolǵan apattan keıin bul qaıǵyly oqıǵa tasjolda qarsy baǵytta júrgizýdiń qanshalyqty jaýapsyz jáne qaýipti ekenin kórsetedi», — dedi.
Ol sondaı-aq: «Bul oqıǵa polısıa ombýdsmeni Fıosýǵa jiberilgendikten, men bul oqıǵa týraly egjeı-tegjeıli aıta almaımyn, biraq garda mundaı kólikterdi toqtatý úshin barlyq sharalardy qoldanatynyn bilemin, sonymen qatar joldyń basqa da paıdalanýshylaryn eskeredi», — dep qosty. Polısıa qyzmetkerleri apattyń mán-jaıyn tergep jatyr. Apat jeksenbi kúni tańǵy saǵat 3 shamasynda Atı qalasynyń mańyndaǵy tasjoldyń 3-shi qıylysynda bolǵan.
Garda kýágerlerdi nemese vıdeoregıstratorlarynda jazbasy bar adamdardy polısıaǵa habarlasýǵa shaqyrady.