2025 jylǵy jeltoqsanda «Damý» kásipkerlikti damytý qory iske qosqan shaǵyn bıznesti qoldaýdyń «İsker aımaq» biryńǵaı baǵdarlamasy 21 mlrd teńgeden astam somaǵa 300-den astam jobany maquldady, dep habarlaıdy infohub.kz saıty.
2026 jyly qarjylandyrý kólemin 20 esege jýyq ulǵaıtyp, 400 mlrd teńgege jetkizý josparlanýda, bul 5 myńǵa jýyq jobany qoldaýǵa múmkindik beredi.
Baǵdarlama mıkro jáne shaǵyn bızneske, onyń ishinde aýyldyq jerler men monokalalardaǵy kásipkerlerge baǵyttalǵan. Jobanyń basty ereksheligi – óńirlik tásil: nesıeleýdiń basym baǵyttaryn ákimdikter «Atameken» Ulttyq kásipkerler palatasymen birlesip, ár oblys ekonomıkasynyń ereksheligin eskere otyryp aıqyndaıdy.
Qordyń málimetinshe, baǵdarlama ártúrli salalardaǵy jobalardy qoldaǵan. Mysaly, Jambyl oblysynda qarjylandyrýdy 20 jyldan astam ýaqyt boıy qoı terisin óńdep, úlbir buıymdaryn shyǵaryp kele jatqan kompanıa aldy. Kásiporyn jyl saıyn shamamen 46 myń terini óńdeıdi, QTJ, İİM jáne Qorǵanys mınıstrligi úshin 20 myńǵa jýyq úlbir buıymyn shyǵarady, sondaı-aq ónimin Reseı men Ózbekstanǵa eksporttaıdy.
Qyzylorda oblysynda jeke kásipker shıki kúrish satyp alýǵa 110 mln teńge tartty. Nesıe 22% mólsherlememen berilgen, onyń 8,8 paıyzdyq tarmaǵyn memleket sýbsıdıalaıdy, sondyqtan kásipker úshin túpkilikti mólsherleme jyldyq 13,2% quraıdy. Kásiporyn táýligine 150 tonnaǵa deıin kúrish óńdeıdi, ónimin Qyrǵyzstanǵa, Reseıge jáne Aýǵanstanǵa eksporttaıdy.
Soltústik Qazaqstan oblysynda medısınalyq jabdyq shyǵarýshy kásiporyn qosalqy bólshekter satyp alý úshin úsh jyl merzimge 100 mln teńge nesıe aldy. Bul ónim shyǵarý kólemin jylyna 5 myńnan 10 myń danaǵa deıin ulǵaıtýǵa jáne bes jańa jumys ornyn ashýǵa múmkindik beredi.