Islam damý banki Qazaqstandaǵy sý sharýashylyǵy jobalaryn iske asyrýǵa granttar men qarjy bóledi, dep habarlaıdy infohub.kz.
Qazaqstan Respýblıkasy Premer-Mınıstriniń orynbasary – ulttyq ekonomıka mınıstri Nurlan Baıbazarov Saýd Arabıasyna jumys saparymen bardy. Onda Islam damý bankiniń (IDB) jyldyq otyrysy ótýde.
Qazaqstannan basqarýshy retinde Nurlan Baıbazarov IDB tobynyń prezıdenti Muhammad Ál-Djasser jáne Islam ınvestısıalar men eksporttyq nesıelerdi saqtandyrý korporasıasynyń (ICIEC) bas atqarýshy dırektory Úsama Qaısımen kezdesý ótkizdi.
AAA deńgeıindegi reıtıńi bar Islam damý banki álemdegi eń belsendi kópjaqty damý bankteriniń biri jáne ıslam qarjysy salasyndaǵy kóshbasshy. Ol qatysýshy elderdiń áleýmettik jáne ekonomıkalyq damýyna úles qosady.
Muhammad Ál-Djassermen kezdesýdiń basty taqyryby Qazaqstannyń sý sharýashylyǵy ınfraqurylymyn jańǵyrtý jobalaryn qarjylandyrý boldy. Bıylǵy rekordtyq tasqyn sýlarǵa baılanysty bul baǵyt úkimettiń basym baǵyttarynyń biri.
Eldiń sý resýrstary áleýetin saqtaý jáne qaýipsizdikti qamtamasyz etý maqsatynda birqatar shuǵyl sharalar qarastyrylýda. Onyń ishinde sý qoımalaryn, gıdrotehnıkalyq qurylystardy jáne sýarý júıelerin salý men qaıta jańartý, sondaı-aq sıfrlandyrý jáne sý únemdeý tehnologıalaryn engizý bar.
Kezdesý qorytyndysy boıynsha IDB tobynyń Qazaqstan Respýblıkasynyń sý jobalaryna aýqymdy ınvestısıalar jiberýi, sondaı-aq tıisti tehnıkalyq qujattamany daıyndaýǵa granttar bólýi týraly kelisimge qol jetkizildi. Alǵashqy transhtar bıylǵy jyly kelip túsedi.
ICIEC-pen kelissózder aıasynda «Báıterek» holdıńiniń uıymdary – KazakhExport eksporttyq-nesıelik agenttigi jáne Qazaqstan Damý Bankimen qaıta saqtandyrý, saqtandyrý jáne kepildik berý boıynsha yntymaqtastyq týraly kelisimderge qol jetkizildi. Kompanıalar kólik ınfraqurylymy, saýdany qarjylandyrý jáne ınvestısıalardy saqtandyrý salasyndaǵy birlesken jobalarǵa múddeli.
Eske sala keteıik, Qazaqstan Islam damý bankiniń múshesi 1995 jyly boldy. Osy ýaqyt ishinde IDB tobynyń qatysýymen respýblıkada jalpy somasy 1,8 mıllıard dollarǵa jýyq 67 joba iske asyryldy.