Eýropanyń ońtústik-batysyn iri orman órtteri sharpydy. Fransıada jalyn Bordoǵa jaqyndasa, Ispanıada ot Madrıd pen ortalyq aımaqtarǵa qaýip tóndirýde. Tótenshe ystyq, qurǵaqshylyq pen kúshti jel apattyń basty sebepteri boldy, dep habarlaıdy infohub.kz saıty.
Fransıadaǵy eń qıyn jaǵdaı eldiń ońtústik-batysyndaǵy Jıronda departamentinde tirkeldi. AP News agenttiginiń dereginshe, baqylaýsyz qalǵan órt Bordoǵa shamamen 15 km jaqyndaǵan. Jırondada 220 myńǵa jýyq adam evakýasıalandy. Land departamentindegi bólek órtke baılanysty taǵy 30 myńdaı turǵyn úılerin tastap ketti. Bılik ottyń taralýynan qaýiptenip, joldardy jaýyp, qaýipti aımaqtarda júrip-turýdy shektedi.
Reuters habarlaýynsha, kúshti jel men qurǵaq ósimdik ahýaldy ýshyqtyryp otyr. Fransýz bıligi órtpen kúresý úshin áskerı kómekti qosa alǵanda, qosymsha kúshter jiberdi.
Ispanıada ortalyq aımaqtar qatty zardap shekti. Negizgi órt oshaqtary Madrıdten batysqa qaraı, Avıla provınsıasynda (Kastılıa jáne Leon avtonomdy qaýymdastyǵy) jáne órt qaýpi joǵary basqa aımaqtarda ornalasqan.
Reuters málimetinshe, Madrıd mańynan 30 myńǵa jýyq adam evakýasıalandy, taǵy 20 myńdaı turǵyn tútin men órt qaýpine baılanysty úılerinde qalýǵa nusqaý aldy. Órtengen aýmaqtyń kólemi 9 myń gektardan asty, al jeldiń ekpini 60 km/saǵ jetip, órt sóndirýshilerdiń jumysyn qıyndatyp otyr. Jalpy Ispanıadaǵy úsh iri órt evakýasıalanǵandar men júrip-turýy shektelgenderdi qosa eseptegende shamamen 88 myń adamǵa áser etti.
Buǵan deıin Ispanıada órtterdiń aýqymyna baılanysty ulttyq tótenshe jaǵdaı jarıalandy. Eýropa memleketteri eki elge de órt sóndirý tehnıkasy men avıasıasyn jiberip, kómek kórsetýde.
Bıylǵy jazda tótenshe ystyq búkil Eýropany qamtyp, birqatar elde temperatýranyń tarıhı rekordtary jańardy.