Izraıl kúshteri Batys Jaǵalaýda eki palestınalyq er adamdy atyp óltirdi. Olar ızraıldik qonystanýshylar tutandyrǵan órtti sóndirýge tyrysqan, dep habarlaıdy infohub.kz.
Jergilikti derekkózderdiń aıtýynsha, Nablýs qalasynyń shyǵysyndaǵy Beıt-Fýrık aýyly mańynda ızraıl áskerleri ok jaýdyryp, tórt palestınalyqty jaralady. Alaıda, oqtyń qonystanýshylardan ba, álde áskerlerden be túskeni belgisiz.
Eki adam keıin jaraqattarynan kóz jumdy. Izraıl olardyń denelerin ustap otyr.
Beıt-Fýrık aýylynyń ákimi Iýsef Hananıdiń aıtýynsha, turǵyndar aınaladaǵy egistikterdegi jalyndy sóndirýge tyrysqan kezde, olarǵa ızraıldik sarbazdar men qonystanýshylar shabýyl jasaǵan.
Izraıl tarapy zańsyz «Dereh-Avraam» beketiniń mańynda bir top palestınalyq egistik órtin tutatyp, qonystanýshylar tobyna shabýyl jasady dep málimdedi. Izraıl áskerı esebine sáıkes, oqıǵa barysynda bir ızraıldik er adam pyshaqtalyp, tikushaqpen aýrýhanaǵa jetkizilgen.
Jergilikti qaýipsizdik jáne saıası derekkózder «Ýafa» agenttigine palestınalyqtardyń órtti sóndirýge tyrysqanyn, biraq olarǵa shabýyl jasalǵanyn rastady.
Hananı ızraıl kúshteriniń Beıt-Fýrıkke kiretin barlyq joldy jaýyp, aınalaǵa kóptegen sarbaz ben qonystanýshyny ornalastyrǵanyn aıtty. Bul ondaǵan palestınalyqtyń aýylda qamalyp qalýyna sebep boldy. Sondaı-aq áskerler bir otbasyn úıinen kóshirýge májbúrlegen.
Órt elektr baǵanalaryn zaqymdap, qonystanýshylar jergilikti palestınalyqtardyń eki kóligin órtegen.
Palestına Qyzyl Jarty Aı Qoǵamy beısenbi kúni ertemen 40 jáne 43 jastaǵy eki er adamnyń ishinen oq jaraqatyn alǵanyn habarlap, olardy aýrýhanaǵa jetkizgen. Alaıda, dál osy ekeýiniń keıin qaıtys bolǵany belgisiz.
Beısenbi kúni keshke ızraıl áskerleri zańsyz Ganım qonysynyń mańynda taǵy bir palestınalyqty atyp óltirdi. Izraıl áskerıleri bul adamnyń bir sarbazdyń aıaǵyna pyshaq salǵanyn, sodan keıin atylǵanyn málimdedi.
Izraıldiń Gazadaǵy genosıdtik soǵysy bastalǵannan beri Batys Jaǵalaýdaǵy zorlyq-zombylyq kúsheıip, áskerı reıdter jıilep, qonystanýshylardyń áreketi artty.
Osy oqıǵalarmen qatar, beısenbi kúni myńdaǵan qonystanýshy men ońshyl ızraıldikter Shyǵys Ierýsalımdegi ál-Aqsa meshiti keshenine basyp kirdi. Shabýyldaýshylar qatarynda Knesset depýtattary, ońshyl ulttyq qaýipsizdik mınıstri Itamar Ben-Gvır, ravvınder men ekstremıstik «Ǵıbadathana uıymynyń» jetekshileri boldy. Olar musylmandardyń qasıetti ornynda ıahýdılik ǵuryptardy oryndady, bul Islamdaǵy úshinshi qasıetti orynnyń mártebesin eskere otyryp, óte arandatýshylyq áreket sanalady.