Sáýir aıynda Stambulda Qazaqstan azamaty Ismaılov atyldy. Bul qastandyq Qazaqstan, Túrkıa jáne Grýzıa quqyq qorǵaý organdary júrgizgen aýqymdy halyqaralyq operasıanyń bastamasy boldy, dep habarlaıdy infohub.kz.
Úsh eldiń ózara is-qımylynyń arqasynda qylmys tez arada ashyldy. Kúdikti eki oryndaýshy ustaldy. Tergeý qylmystyń sebebin, sondaı-aq uıymdastyrýshy men tapsyrys berýshini anyqtady. İİM dereginshe, olar transulttyq qylmystyq ortanyń ókilderi jáne halyqaralyq izdeýde júr.
Tergeý barysynda alynǵan aqparat UQK-men birlesip, Qazaqstan aýmaǵynda osy toptyń basqa da aýyr qylmystaryn ashýǵa múmkindik berdi. Topty AQSH-ta jýrnalısi óltirmek bolǵany úshin sottalǵan qylmystyq bedel basqarǵan. Almatyda polısıa qyzmetkerleri toptyń kúdikti bir killerin ustady. Tergeý nusqasy boıynsha, ol 2025 jyldyń tamyzynda qala turǵynyna qastandyq jasaýǵa qatysy bar. Qarý – tapansha – tárkilendi. Tergeý aıaqtalyp, qylmystyq is sotqa joldandy.
İİM Uıymdasqan qylmysqa qarsy kúres departamentiniń ókili Qýandyq Alpystyń aıtýynsha, ustaýlar Qazaqstan, Túrkıa jáne Grýzıa aýmaǵynda kezeń-kezeńmen júrgizildi. «İİM Grýzıa jáne Túrkıa áriptesterimen birlesip, úsh memleket aýmaǵynda transulttyq uıymdasqan qylmystyq top múshelerin ustaý boıynsha kezeń-kezeńmen arnaıy operasıa júrgizdi. Almaty qalasynda atalǵan qylmystyq qurylymnyń múshelerinen quralǵan bir top adam ustaldy, olarǵa qarý qoldanylǵan birneshe shabýyl faktilerine qatystylyq taǵylady», – dedi ol.
Tergeý nusqasy boıynsha, qylmystyq toptyń maqsaty – qylmystyq ıdeologıa elementterin paıdalana otyryp, dıasporalyq qaýymdastyqtardyń jekelegen ókilderiniń bıznesine qylmystyq yqpal etý bolǵan. Sonymen qatar, Grýzıada İİM dereginshe transulttyq qylmystyq qurylymdarmen baılanysty jáne birqatar aýyr qylmystarǵa qatysy bar kúdiktiler ustaldy. İİM barlyq anyqtalǵan epızodtar boıynsha dáleldemeler jınaýdy jalǵastyryp, qylmystyq toptyń basqa da múshelerin anyqtaýda. Sondaı-aq uıymdastyrýshyny jaýapkershilikke tartý boıynsha jumys júrgizilýde.