Italıanyń Bıtonto qalasynyń turǵyny mıllıon eýro utqan lotereıa bıletin tastap, baılyǵynan aıyryla jazdady. Baqytyna oraı, jergilikti qoqys shyǵarý qyzmetiniń qyzmetkerleri tonnaǵa jýyq qoqysty suryptap, bıletti taýyp berdi, dep habarlaıdy infohub.kz.
Er adam lotereıa bıletin satyp alyp, dúkende teksergen kezde «tólenbeıdi» degen jazý kórgen. Ol kombınasıa utpady dep oılap, bıletti tastaǵan. Alaıda keıin týystary túsken 2, 4, 8, 19 jáne 51 sandary onyń bıletindegi sandarmen sáıkes keletinin baıqaǵan. Al jazý dúkenniń kasasy mundaı úlken utysty tóleı almaıtynyn ǵana bildirgen.
Ol kezde úıdegi qoqys áldeqashan shyǵarylyp ketken edi. Er adam jergilikti SANB qoqys kompanıasyna júgingen. Kásiporyn dırektory qoqys tıelgen kólikti toqtatyp, arnaıy bazaǵa jiberýdi buıyrǵan. Bul oqıǵa jeksenbi kúni bolǵany sáttilik, áıtpese qoqys polıgonǵa birden jetkiziler edi.
Kompanıa qyzmetkerleri eki kún boıy qoqysty suryptap, kóptegen zaqymdalǵan chekterdiń arasynan qajetti bıletti tapqan. Mıllıon ıesi izdeýge ketken barlyq shyǵyndy óteıtinin aıtqan. Al sáttilikke shabyttanǵan qoqys jınaýshylar bıletti tapsyrǵannan keıin skrech-karta satyp alyp, 50 eýro utyp alǵan.