Ońtústik Lıvandaǵy Kfar-Rýmman aýylyna tańerteń Izraıl áskerı-áýe kúshteri eki ret shabýyl jasady. Lıvan Densaýlyq saqtaý mınıstrliginiń málimetinshe, zardap shekkenderdiń arasynda áıelder men balalar da bar. Bul — eki aı buryn jasalǵan ýaqytsha bitimge qaramastan, Izraıl men «Hezbolla» toby arasyndaǵy qaqtyǵystyń jańa kezeńi. Aıta keteıik, Izraıl áskeri buǵan deıin strategıalyq mańyzy bar Álı Taher tóbesin baqylaýǵa alǵanyn málimdegen edi, bul tóbe birneshe aýyl men Nabatıa qalasyna aparatyn negizgi joldardyń ústinde ornalasqan.
Mınıstrliktiń habarlaýynsha, alǵashqy soqqy ǵımaratqa tıip, segiz adam qaza tapty, onyń ishinde bir bala men eki áıel bar. Taǵy 11 adam jaraqat aldy, olardyń tórteýi — balalar, ekeýi — áıelder. Ekinshi shabýyl aýyldaǵy avtokólikke jasalyp, Lıvandyq «Rısala» skaýttar qaýymdastyǵynyń feldsheri qaza taýyp, taǵy eki adam jaralandy.
Kfar-Rýmman turǵyny Fýad Shakaron qıraǵan ǵımarattyń aldynda turyp: «Biz únemi atys saldarynan alańdaýshylyqta ómir súrdik. Endi olar aýyldyń dál ortasyna soqqy jasady», — dedi. Taǵy bir turǵyn Salıh Medlej qıraǵan ǵımaratty nusqap, bul jerde balaly otbasylar turatynyn aıtyp: «Munda zymyrandar bar ma?» — dep surady. Ol áýe shabýyldary men atysqa qaramastan, týǵan jerin tastap ketpeıtinin málimdedi.
Dál osy kúni tańerteń Izraıl áskeri Deır-áz-Zahranı aýylyndaǵy bir úıge qatysty evakýasıa týraly eskertý jasap, kóp uzamaı ǵımaratqa soqqy jasaldy. Izraıl áskerıleri bul — «Hezbolla» sodyrlarynyń dron shabýylyna jaýap ekenin aıtty. Qurbandar týraly aqparat joq.
Aldyńǵy kúni, jeksenbide, Izraıldiń soqqylary Ońtústik Lıvanda keminde jeti adamnyń ómirin qıyp, bos turǵan aýrýhanany qıratqan edi. AQSh deldaldyǵymen jasalǵan Izraıl men «Hezbolla» arasyndaǵy ýaqytsha bitim birneshe ret buzyldy: Izraıl Lıvanǵa áýe shabýyldaryn jalǵastyrýda, al «Hezbolla» ızraıldik áskerlerge drondarmen shabýyl jasaýda.
Maýsym aıynda Lıvan men Izraıl AQSh deldaldyǵymen jasalǵan negizdemelik kelisimge qol qoıǵan bolatyn. Oǵan sáıkes, Izraıl áskerleri Ońtústik Lıvannan shyǵýy kerek, al «Hezbolla» qarýsyzdanýy tıis. Alaıda bul kelisimniń iske asýy baıaý júrip jatyr. «Hezbolla» Lıvan-Izraıl kelissózderine qatyspaıdy jáne Lıtan ózeniniń soltústigindegi aýmaqtarda qarýyn tastamaıtynyn málimdedi. Izraıl tarapy bolsa, «Hezbolla» búkil el boıynsha qarýsyzdanbaıynsha, áskerin shyǵarmaıtynyn aıtýda.
Kfar-Rýmmannyń meri Abdýlla Farhat bolǵan oqıǵany «sózdiń tolyq maǵynasynda qyrǵyn» dep sıpattady. Ol Lıvan men Izraıl arasyndaǵy kelisimdi synǵa alyp: «Lıvan basshylary kelisimge qol qoıdy, al biz munda onyń qunyn tólep jatyrmyz. Jaý eshteńeden qaımyqpaıdy», — dedi. Bul — kelisimge qol qoıylǵannan beri jalǵasyp kele jatqan shabýyldarǵa qatysty aıtylǵan pikir.