Izraılde sot Negev shólindegi «Ksıot» túrmesin kúzetý úshin qoltyraýyndardy paıdalaný jobasyn ýaqytsha toqtatty. Bul túrmede terorızmge qatysty ister boıynsha aıyptalǵan nemese sottalǵan palestınalyqtar ustalady, dep habarlaıdy infohub.kz saıty.
Bul bastamany ulttyq qaýipsizdik mınıstri Itamar Ben-Gvır usynǵan. Onyń jospary boıynsha túrmeniń bir bóliginiń aınalasyna tereń orlar qazylyp, olarǵa qoltyraýyndar ornalastyrylýy tıis bolǵan. Jyrtqyshtar qosymsha qaýipsizdik sharasy retinde tutqyndardyń qashýyna jol bermeýi kútilgen.
Jobaǵa Let The Animals Live janýarlardy qorǵaý uıymy qarsy shyqty. Onyń ókilderi qoltyraýyndardy mundaı maqsatta paıdalaný zańsyz jáne janýarlarǵa da, qorshaǵan ortaǵa da zıan tıgizýi múmkin ekenin málimdedi.
Ierýsalım okrýgtik soty janýarlardy qorǵaýshylardyń talabyn qoldap, jobany ýaqytsha toqtatty. Sot sondaı-aq úkimet óz ustanymyn bildirmeıinshe, bılikke eshqandaı áreket jasaýǵa tyıym saldy. Bul tamyz aıynyń ortasyna qaraı bolady dep kútilýde.
Izraıl BAQ-tyń málimetinshe, jobany iske qosýǵa daıyndyq qazirdiń ózinde bastalǵan. Túrme aınalasynda transheıalar qazyla bastaǵan, al pılottyq jobaǵa shamamen 21 mıllıon shekel (shamamen 3,25 mıllıard teńge) bólingen.
Ben-Gvırdiń ózi sot sheshimin qatty synǵa aldy. Onyń aıtýynsha, sot júıesi «terrorıster jaǵynda» jáne el qaýipsizdigin qamtamasyz etý sharalaryn qabyldaýǵa kedergi keltirýde.
Buǵan deıin «Kýrsıv» Aqtóbe turǵyny Qazaqstan SİM-ne 24 jastaǵy ulyna kómek surap júgingenin jazǵan. Ol eki jylǵa jýyq ýaqyttan beri Grekıa túrmesinde otyr. Áıeldiń aıtýynsha, Rashıd Kadırov mıgranttardy zańsyz tasymaldaǵany úshin 125 jylǵa bas bostandyǵynan aıyrylǵan.