Áleýmettik jelilerde «Ile-Balhash» rezervatynda jaqynda tabıǵatqa jiberilgen jolbarystyń fotosy tarap jatyr. Bul sýret qazaqstandyqtardyń alańdaýshylyǵyn týdyrdy, alaıda Ekologıa jáne tabıǵı resýrstar mınıstrligi bul aqparattyń jalǵan ekenin málimdedi, dep habarlaıdy infohub.kz.
Vedomstvonyń aıtýynsha, jarıalanǵan sýrette jasandy ıntellekt tehnologıasyn qoldaný arqyly jasalýy múmkin belgiler bar. «Bul aqparat shyndyqqa sáıkes kelmeıdi», — dep atap ótti mınıstrlikte.
Alańdaýshylyqty seıiltý úshin mınıstrlik jiberilgen jolbarystyń spýtnıktik GPS-jaǵasymen jabdyqtalǵanyn eske saldy. «Ile-Balhash» rezervatynyń mamandary onyń ornalasqan jeri men jaǵdaıyn táýlik boıy baqylap otyr.
«Azamattardy jáne buqaralyq aqparat quraldarynyń ókilderin aqparatty taratý aldynda onyń durystyǵyn tekserýge jáne tek resmı kózderdi paıdalanýǵa shaqyramyz», — dep qosty mınıstrlik. Sondaı-aq, ádeıi jalǵan aqparat pen dáıeksiz foto- jáne beınematerıaldardy taratý zańǵa sáıkes jaýapkershilikke ákep soǵatynyn eske saldy.
Eske salaıyq, jaqynda «Ile-Balhash» memlekettik tabıǵı rezervatynda Úmit esimdi amýr jolbarysy jabaıy tabıǵatqa jiberildi. Bul — 70 jyldan astam ýaqyt buryn jyrtqyshtar joıylǵannan keıin eldiń tabıǵı mekenine qaıta oralǵan alǵashqy jolbarys. Oǵan deıin ol birneshe aı arnaıy qorshaýda ómir súrip, beıimdelýden ótken bolatyn. Veterınarlar onyń densaýlyǵyn tekserdi, mamandar ańshylyq daǵdylaryn baǵalap, onyń derbes ómirge daıyn ekenine kóz jetkizdi.