Japonıada jabaıy janýarlardyń densaýlyǵy men jaılylyǵyna nazar aýdarýdyń artýyna baılanysty olarmen jumys isteý formattary jappaı qaıta qaralýda, dep habarlaıdy infohub.kz.
Iokogamadaǵy Zoorasia haıýanattar baǵynda teńiz shoshqalary men tyshqandardy sıpaýǵa bolatyn ınteraktıvti aımaq jabyldy. Bul qadam ákimshilik janýarlardyń densaýlyǵyn saqtaý úshin jasaldy: jaz aılaryndaǵy ystyq pen tolyqqandy kondısıonerdiń bolmaýynan janýarlar stress alyp júrdi. Bilim berý fýnksıasyn saqtaý úshin kemirgishter qaladaǵy jaqsy jaǵdaıy bar basqa haıýanattar baǵyna aýystyryldy.
Fýkýokadaǵy Marine World Uminonakamichi okeanarıýmynda tanymal kontaktili aımaqtan bas tartyldy. Kelýshilerge teńiz juldyzdaryn, teńiz kirpilerin jáne germıt shaıandaryn ustaýǵa ruqsat etilgen edi, biraq abaısyz qarym-qatynas olardyń aýrýyna jáne ólimine ákeldi. Sarapshylardyń aıtýynsha, mundaı oıyn-saýyqtan bas tartý Dúnıejúzilik haıýanattar parkteri men akvarıýmdar qaýymdastyǵynyń álemdik standarttaryna sáıkes keledi.
Keıbir mekemeler odan ári baryp, jetkilikti jaılylyqty qamtamasyz ete almaıtyn túrlerdi ustaýdan bas tartady. Omýta qalasyndaǵy haıýanattar baǵynda jalǵyz pil ólgennen keıin jańa pilderdi ákelmeý týraly sheshim qabyldandy. Pilder — úıirli janýarlar, al haıýanattar baǵynda olardyń tobyn ustaýǵa oryn joq. Kireberiske kelýshilerge bul alyptardyń joqtyǵynyń sebebin túsindiretin taqtaısha ornatyldy.