Londondaǵy Ońtústik Koronar sotynda burynǵy Kembrıdj profesory Djeıson Ardeıdiń qazasyna qatysty tergeý ashyldy. Bul týraly infohub.kz saıty habarlaıdy.
41 jastaǵy Ardeı 2023 jyly Kembrıdj ýnıversıtetiniń tarıhyndaǵy eń jas qara násildi profesor atanǵan edi. Ol 13 tamyzda Londonnyń ońtústigindegi úıinde qaıtys boldy. Buǵan deıin ol akademıalyq ortadaǵy jetistikterine qatysty synǵa ushyrap, 5 tamyzda qyzmetinen ketken bolatyn.
Tergeýdi aǵa koroner Djýlıan Morrıs júrgizedi. Onyń aıtýynsha, Ardeıdiń ólimi tabıǵı emes bolýy múmkin, sondyqtan tergeý bastaldy. Polısıa oqıǵany kútpegen jaǵdaı dep sanaıdy, biraq kúdikti dep eseptemeıdi.
Ardeıdiń biliktiligine qatysty suraqtardy burynǵy Kembrıdj fılosofıa zertteýshisi Natan Kofnas kótergen edi. Kofnas ádiletti qoǵamda qara násildiler sport pen oıyn-saýyqtan tys joǵary laýazymdarda sırek kezdesetinin aıtqan. Ol Belgıadaǵy Gent ýnıversıtetindegi qyzmetinen ýaqytsha shettetilgen.
Kofnastyń aıyptaýlarynan keıin baspasózde Ardeıdiń 2015 jylǵy doktorlyq dısertasıasyndaǵy 100-den astam úzindi basqa zertteýshiniń eńbegimen sáıkes keletini týraly maqalalar jarıalandy. Ardeı plagıatty joqqa shyǵardy, biraq dısertasıamen jumys isteý kezinde keıbir qatelikter jibergenin moıyndady.
Sondaı-aq onyń 35 kúnde 30 marafon júgirip, 6 kúnde 600 mıl jol júrip, qaıyrymdylyqqa 5,5 mıllıon fýnt jınaǵany týraly málimdemeleri de kúmán týdyrdy. Keıin Ardeı bul sandardy túzetti. Onyń 11 jasqa deıin sóıleı almaǵany, 18 jasynda oqı jáne jaza almaǵany týraly aıtqandary da synǵa ushyrady.
Ardeıdiń qazasy kópshiliktiń qaıǵysyn týdyrdy. Onyń esimine arnalǵan qaıyrymdylyq aksıasynda 7 900 adam 225 myń fýnt jınady. Bul qarajat onyń otbasyna qarjylyq jáne praktıkalyq kómek kórsetýge, sondaı-aq jerleý shyǵyndaryn óteýge jumsalady.
Tergeýdiń resmı bastalýy Ardeıdiń «Uly jáne baqytsyz oqıǵalar» atty estelik kitabynyń Ulybrıtanıada jaryqqa shyǵýynan bir kún buryn bolyp otyr. Kitapta onyń bala kezinde sóıleı almaǵan, jasóspirim kezinde saýatsyz bolǵan qara násildi balanyń Kembrıdj tarıhyndaǵy eń jas qara profesorǵa aınalý joly baıandalady.