Jer ana týraly mysal
Ertede Jer kirshiksiz taza bolǵan. Ol páktigin ózin senip tapsyratyn ómirlik jan jaryn kútýmen bolǵan kelindeı saqtaǵan. Ol sheksiz meıirimdi ári jaıdary edi. Ol janýarlar áleminiń úıirleri, tabyndary men otarlaryna pana boldy, olarǵa azyq berdi, al olar Jerdiń kórkemdigi men tazalyǵyn saqtap, oǵan uqypty qarady.

Kúnderdiń bir kúninde Táńiradam paıda boldy. Ol qudiretti, zor, ári symbatty boldy. Ol kúlgende, onymen birge kún de kúletin, ol qamyqqanda onymen birge aı da qaıǵyǵa batatyn, ol án aıtqanda oǵan aspan men jel qosylyp án shyrqaıtyn, sondyqtan Jer oǵan ǵashyq boldy. Ol da Jerge ǵashyq boldy, onyń ulylyǵy men keńdigine, meıirimdiligi men kórkemdigine, asqaqtyǵy men tazalyǵyna ǵashyq boldy.

Ýaqyt óte kele olar balaly boldy. Sábıler ósip, aıbattanyp, ózderi náreste súıdi, biraq árbir jańa urpaq olarǵa ómir syılaǵan uly mahabbattan alystaı berdi.
Jer ana olar úshin ómir súrýdiń, baılyqtyń qaınar kózine aınaldy, olar onyń kim ekenin de umytty, al Táńiradam olar úshin biri senip, biri senbeıtin ańyzǵa aınaldy.
Olar ózderiniń qajettilikteri úshin jer jyrtyp, tyrmalap, egin egip, ony jınap, arttarynan shirip, Jerdiń bastapqy tazalyǵyn qurtatyn kóp mólsherdegi qaldyqtar tastady. Tamaq izdep, olar Jerdiń mápelep ósirgen janýarlaryn aıaýsyz jaıratty. Sodan soń, altyn jáne basqa da qazba baılyqtardy izdep Jer ananyń denesin oıyp, úlken shuńqyrlar qazyp, shól men shóleıtterdi qaldyrdy. Biraq bul da az boldy, olar jarylystar jasap, ózderi sıaqtylardyń kózderin qurtý úshin qýatty qarýlardy synaqtan ótkizip, ol qarýlardy bir - birimen soǵystarda qoldandy.

Al Jer ana osynyń bárine shydady, ol adamdar bir kúni esterin jıady dep, óziniń olarǵa ómir syılaǵanyn, olar uly mahabbattyń perzentteri ekenin eske túsiredi dep, adamdar oǵan súıikti, taza bolýǵa quqyq beredi dep sendi, ózine kinásiz óltirilgenderdi jerleýdi toqtatady dep, bir kezde ózin senip tapsyrǵan Táńiradamnyń laıyqty ul - qyzdary bolady dep úmittendi, kútti.

Osydan keıin, ol ózin adamdardyń esterine salamyn dep sheship, barlyq tózimniń shegi baryn eskertip, óz kúshin kórsetti. Biraq ózara soǵystarǵa belshesinen batqan, altynnyń zyńylynan kereń bolǵan, sarańdyqtan kózderin qarańǵy basqan adamdar kúnálary shamadan tys shyqqanǵa deıin baılyq pen oınastyqtyń eligine aldanyp, nadandyqtyń shyrqaý shyńyna jetip, adamdyqtyń bıiginen tómendep, ári qaraı ómir súre berdi.

Sonda mánsiz óktemdikten sharshaǵan Jer ana boıynan barlyq qaharyn shyǵaryp, úlken tolqynymen ózin qorlyq pen zábirden shaıyp, shegi joq azap pen oınastyqtan, adam bolýdy qoıǵandardyń óshpendilikteri men yzalarynan tazartty, al Táńiradam adamdardan syrt aınalyp, jaı Táńir boldy.

Eger adamzat Jerge qaıyrymdy bolyp, naǵyz súıispeshiligin kórsete almasa, al Táńiradamǵa adamǵa degen shynaıy senimin qaıtara almasa, Jer ana men Táńiradamnyń mahabbat dastany, adamzat órkenıetiniń paıda bolýy men qalyptasý tarıhy osylaısha ókinishti aıaqtalýy múmkin.

Derekkózi: tolegenmukhamejanov. kz