Sońǵy jańartý

(Ózgertilgen ýaqyty 7 saǵat buryn)
Jer júzine qarasam...
Jer júzine qarasam,
Neshe túrli halyq bar.
Din, ımanyn, sanasam,
Myńnan artyq anyq bar.

«Bul qalaı?» dep oılasam,
Munyń da bir syry bar.
Tereń oıǵa boılasam‚
Dál mynadaı túri bar:

Jardyń shashy sansyz kóp‚
Ol sanaýǵa kelmeı tur.
Anyq nury osy dep,
Árkim bir tal ustap júr.

Bireý otqa jaǵyndy:
«Nurdyń túbi – Qudaı»,– dep.
Ne sýretke tabyndy:
«Olaı emes‚ bylaı»,– dep.

Biri: «Qudaı – bir»,– dese‚
Biri aıtady: «Kóp Qudaı».
Biri: «Táńiri – kún»,– dese‚
Biri deıdi: «Joq Qudaı».

Mine‚ osydan baıqaldy –
Bári izdep júr ıesin.
Tabamyz dep oıǵa aldy‚
Jaratqannyń kıesin.

Jas qozydaı bolyp tur‚
Bilsek munyń mysaly.
Qoltyq, shabyn túrtip júr‚
Anyq soǵan uqsady.

Oıdy kimnen alǵanyn
Adam ózi sezbeıdi.
Jannyń aıdap salǵanyn
Sezbese de izdeıdi.

Haqıqattyń taraýy
Túgel jetpeı qalmaıdy.
Ártúrli bop qaraýy
Kóbi anyqtaı almaıdy.

Jerdiń júzin dál taýyp‚
Eshbir din joq ornyqqan.
Bárinde de bar qaýip‚
Din kóbeıdi sondyqtan.

Sol kóp dinde sheshý bar‚
Ol sheshýdiń arty bar.
Adasqanǵa keshý bar‚
Keshýdiń de sharty bar.

Aq júrekpen tabynyp,
Shyn izdese táńirisin.
Qıanatty jaý bilsin‚
Onan tıyp nápsisin.

Táńiri joly – aq júrek‚
Saıtan degen – qıanat.
Aq júrekti erterek‚
Esker-daǵy qyl ádet!

Úsh nársege haqıqat,
Nansań, ıman, tipti, ońaı.
Kúná degen – qıanat,
Jan joǵalmas, bar Qudaı.

Osy úsheýin aqylmen,
Ábden synap nana alsań,
Aq jolyna qoıdyń den,
Anyq uǵyp qana alsań.


You Might Also Like

Jańalyqtar

Jarnama