Áıeldiń júktilik jáne bala emizý kezinde alergen ónimderdi tutynýy náresteniń bir jasqa tolǵanǵa deıingi taǵamdyq alergıa qaýpin tómendetpeıdi. Osyndaı qorytyndyǵa Adelaıda ýnıversıtetiniń aýstralıalyq ǵalymdary keldi. Olar ananyń rasıonyna alergenderdi belsendi qosýdyń balalarda týylǵanǵa deıin jáne laktasıa kezeńinde olarǵa tózimdilik qalyptastyra alatyny týraly boljamdy tekserdi, dep habarlaıdy infohub.kz saıty.
İri PrEggNut klınıkalyq zertteýiniń nátıjeleri The New England Journal of Medicine jýrnalynda jarıalandy. Bul týraly News-Medical jazady.
Tájirıbege otbasylarynda buryn astma nemese ekzema sıaqty alergıalyq aýrýlar tirkelgen 2137 júkti áıel qatysty. Qatysýshylar eki topqa bólindi: birinshisi júktilik jáne laktasıanyń alǵashqy 4 aıy ishinde aptasyna keminde 6 jumyrtqa men 60 jerjańǵaq jedi, al ekinshisi standartty dıeta ustandy — 3 jumyrtqa men 30 jańǵaqtan aspaıdy.
Balalar 12 aıǵa tolǵanda zertteýshiler teri synamalary men aýyz arqyly provokasıalyq testter júrgizdi. Jumyrtqaǵa nemese jerjańǵaqqa taǵamdyq alergıa alergendi kóp tutynǵan toptaǵy nárestelerdiń 7,8%-ynda, al baqylaý tobyndaǵy balalardyń 8,4%-ynda damyǵany anyqtaldy. Bul aıyrmashylyq statısıkalyq turǵydan eleýsiz bolyp shyqty.
Zertteý avtorlary júktilik jáne bala emizý kezinde ananyń rasıonyn ózgertý baladaǵy taǵamdyq alergıanyń aldyn alýǵa kómektespeıdi degen qorytyndyǵa keldi. Sonymen qatar ǵalymdar bul ónimderdi náresteniń ózine qosymsha taǵam retinde alty aı shamasynda ýaqtyly engizý profılaktıkanyń tıimdi joly bolyp qala beretinin atap ótedi.