Qazaqstandyq JET Group kompanıasy, elimizdegi kıksherıng operatorlarynyń irileriniń biri, nazaryn Latyn Amerıkasyna aýdarýda. 2026 jyldyń birinshi toqsanynyń qorytyndysy boıynsha Brazılıa kompanıaǵa barlyq kiristiń 92,3%-yn qamtamasyz etti, dep habarlaıdy infohub.kz.
Buǵan ekonomıs ári Finmentor.kz Telegram-arnasynyń avtory Arman Bataev nazar aýdardy. JET Group-tyń 2026 jyldyń birinshi toqsanyndaǵy qarjylyq eseptiligine sáıkes, kompanıanyń kirisi 85,5%-ǵa – $8,62 mln-nan $15,99 mln-ǵa deıin ósti. Taza paıda 40,3%-ǵa artyp, $1,18 mln-ǵa jetti. Kıksherıng baǵytynyń EBITDA kórsetkishi eki eseden astam ósip, $2,62 mln-nan $5,57 mln-ǵa jetti.
Kompanıa úshin negizgi naryq Brazılıa boldy, onda kiris eki esege jýyq ósti – $7,39 mln-nan $14,76 mln-ǵa deıin. Nátıjesinde, JET Group-tyń jalpy kirisindegi eldiń úlesi 92,3%-ǵa jetti.
Bataevtiń aıtýynsha, kompanıa Ońtústik Amerıka naryqtaryna basymdyq beredi, óıtkeni Qazaqstannan aıyrmashylyǵy, onda elektr samokattardy jyl boıy paıdalanýǵa bolady. Brazılıadan basqa, JET Group Chılı men Meksıkada bıznesin damytýda.
Chılılik Forbes-tiń habarlaýynsha, JET Group elde bir jyldan beri jumys isteıdi. Qazir kompanıa astanasy Santágonyń alty aýdanynda 2 myńnan astam elektr samokat pen 500 elektr velosıpedti paıdalanady jáne naryqtyń shamamen 20%-yn ıelenedi.
Brazılıada kompanıanyń pozısıasy aıtarlyqtaı kúshti. Bataev keltirgen derekter boıynsha, JET Group qoldanbany júkteý sany boıynsha da, aı saıynǵy belsendi paıdalanýshylar sany boıynsha da naryqtyń shamamen 85%-yn baqylaıdy. Kompanıa Chılıde de osyndaı kórsetkishterge jetýdi josparlap otyr, ol úshin bıyl jergilikti bızneske $7 mln ınvestısıalaýdy kózdep otyr.
Meksıkada JET Group 2026 jyldyń sáýirinde San-Pedro-Garsa-Garsıa qalasynda qyzmetin iske qosyp, jumysyn bastady. 10 maýsymda kompanıa Mehıkonyń ońtústiginde 500 elektr samokatty ornalastyratynyn málimdedi. Joba fýtboldan álem chempıonatyna kólik ınfraqurylymyn daıyndaýǵa jáne jankúıerlerdiń «Asteka» stadıonyna barýyna baılanysty.
Sondaı-aq, JET Group jaqynda 50 mln dırham kólemindegi oblıgasıalyq baǵdarlama aıasynda 10 mln dırham kólemindegi eki jyldyq jasyl oblıgasıalardy ornalastyrdy.
2026 jyldyń sáýirinde qazaqstandyq JET kıksherıngi bes jyldyǵyn atap ótti. Osy jyldar ishinde Almatydaǵy startap Ortalyq Azıa men Kavkazdan Chılıge deıingi segiz elde 75 myńnan astam qurylǵysy bar halyqaralyq holdıńke aınaldy.
Kompanıanyń 2024 jylǵy eseptiligindegi derekterge sáıkes, Jet Group-tyń eń iri aksıoneri – qazaqstandyq kásipker, kompanıanyń negizin qalaýshy Meırambek Abelkasov (qarapaıym aksıalardyń 18,62%-y).