Jetisý oblysynda qatty jańbyrdan keıin Saryózek – Kóktal respýblıkalyq tas jolyna tasqyn tas jolǵa shyqty, dep habarlaıdy infohub.kz.
«QazAvtoJol» UK» AQ baspasóz qyzmetiniń málimetinshe, Jetisý oblysynyń Panfılov aýdanynda qatty jańbyr jaýǵan. Taýly jer bederiniń ereksheligine baılanysty qatty betki aǵyn paıda bolyp, sý, laı men tastar respýblıkalyq mańyzy bar joldyń jekelegen ýchaskelerine shyqqan.
Stıhıanyń saldary joldyń birneshe ýchaskesinde tirkelgen. Aǵyndar joldyń júrý bóligin kesip ótip, keı jerlerde jol jıekteri men topyraq tósemi shaıylyp, qorshaý elementteri zaqymdanǵan. Kishi kópirler men sý ótkizgish qurylystardyń mańynda laı men tas shógindileri paıda bolǵan, keıbir sý burý aryqtary sý kólemine tótep bere almaǵan.
Qazirgi ýaqytta taý betkeılerinen sý kelýi toqtap, joldyń júrý bóliginen asyp tógilý joq, sý deńgeıi tómendep, jaǵdaı turaqtaldy.
Jol qyzmetteri zardaptardy joıýǵa dereý kiristi. Jumystarǵa 11 jol jumysshysy men 7 birlik arnaıy tehnıka jumyldyryldy. DEÝ-90 jáne DEÝ-18 qyzmetkerleri joldyń júrý bóligin, jol jıekterin, sý burý aryqtaryn, kishi kópirler men sý ótkizgish qurylystardy laı men tas shógindilerinen tazartýda. Shaıylǵan topyraq tósemi men jol jıekterin nyǵaıtý, sý burýdy qalpyna keltirý jáne zaqymdanǵan qorshaý elementterin jóndeý jumystary júrgizilýde.
Mamandar tas joldy tekserýdi jalǵastyryp, zaqym kólemin jáne jekelegen ýchaskelerdi tolyq qalpyna keltirýge qajetti materıaldardy naqtylaýda. Joldyń jaı-kúıi jol qyzmetteriniń turaqty baqylaýynda.